Reuters: ტრამპის ადმინისტრაცია მიმდინარე კვირაში ნატოელ მოკავშირეებს აცნობებს, რომ შეამცირებს იმ სამხედრო შესაძლებლობების რესურსს, რომელსაც აშშ ალიანსის ევროპული წევრების დასახმარებლად გამოყოფდა სერიოზული კრიზისის შემთხვევაში

ტრამპის ადმინისტრაცია მიმდინარე კვირაში ნატოელ მოკავშირეებს აცნობებს, რომ შეამცირებს იმ სამხედრო შესაძლებლობების რესურსს, რომელსაც აშშ ალიანსის ევროპული წევრების დასახმარებლად გამოყოფდა სერიოზული კრიზისის შემთხვევაში. ინფორმაციას ამის შესახებ სააგენტო Reuters-ი ინფორმირებულ წყაროებზე დაყრდნობით ავრცელებს.

ჩარჩო-პროგრამის ფარგლებში, რომელიც „ნატოს ძალების მოდელის“ (NATO Force Model) სახელითაა ცნობილი, ალიანსის წევრი ქვეყნები განსაზღვრავენ ხელმისაწვდომი სამხედრო ძალების რესურსს, რომელთა გააქტიურებაც შესაძლებელი იქნება კონფლიქტის ან ნებისმიერი სხვა მასშტაბური კრიზისის დროს - მაგალითად, ნატოს წევრზე სამხედრო თავდასხმის შემთხვევაში.

მიუხედავად იმისა, რომ ომისდროინდელი ძალების ზუსტი შემადგენლობა მკაცრად გასაიდუმლოებულია, პენტაგონმა გადაწყვიტა მნიშვნელოვნად შეამციროს თავისი ვალდებულებების მოცულობა - განაცხადეს წყაროებმა.

ამერიკის პრეზიდენტს, დონალდ ტრამპს მკაფიოდ აქვს გამოხატული პოზიცია, რომ საკუთარი კონტინენტის უსაფრთხოებაზე ძირითადი პასუხისმგებლობა თავად ევროპულმა სახელმწიფოებმა უნდა აიღონ და არა აშშ-მა. მოკავშირეების მისამართით ამ კვირაში გაჟღერებული მესიჯი იმის მკაფიო დასტურია, რომ ეს პოლიტიკა უკვე საქმედ იქცევა.

რამდენიმე დეტალი კვლავ ბუნდოვანი რჩება, მათ შორის ის, თუ რამდენად სწრაფად გეგმავს პენტაგონი კრიზისულ სიტუაციებზე რეაგირების პასუხისმგებლობის ევროპელ მოკავშირეებზე გადაბარებას. თუმცა, წყაროების ცნობით, პენტაგონი პარასკევს, ბრიუსელში, თავდაცვის პოლიტიკის ხელმძღვანელების შეხვედრაზე აპირებს განაცხადოს საკუთარი განზრახვის შესახებ, რომელიც ვალდებულებების შემცირებას გულისხმობს.