Reuters: ზელენსკის ოფისმა უკრაინის გენერალურ პროკურორს ლუკაშენკოს წინააღმდეგ სისხლისსამართლებრივი დევნის დაწყების საკითხის განხილვის თხოვნით მიმართა

სამშაბათს გასაჯაროებული წერილის თანახმად, პრეზიდენტ ვოლოდიმირ ზელენსკის ოფისმა უკრაინის გენერალურ პროკურორს ბელარუსის პრეზიდენტის, ალექსანდრ ლუკაშენკოს წინააღმდეგ სისხლისსამართლებრივი დევნის დაწყების საკითხის განხილვის თხოვნით მიმართა. ინფორმაციას ამის შესახებ სააგენტო Reuters-ი ავრცელებს.

წერილში აღნიშნულია, რომ უკრაინის პრეზიდენტის ოფისმა უპასუხა დევნილობაში მყოფი ოპოზიციური ჯგუფის, „ბელარუსის დემოკრატიული ფორუმის“ მიმართვას. ამ უკანასკნელმა მაისში ვოლოდიმირ ზელენსკის წერილი გაუგზავნა, სადაც კიევს ლუკაშენკოს წინააღმდეგ ომის დანაშაულების, გენოციდისა და „სახელმწიფო ტერორის“ ბრალდებებით სისხლისსამართლებრივი დევნის დაწყება სთხოვა.

„ფორუმმა“ მას ბრალი დასდო რუსეთის მიერ უკრაინაში წარმოებულ ომში თანამონაწილეობასა და სულ მცირე 2 442 უკრაინელი ბავშვის ბელარუსში იძულებით გადაყვანაში. აღნიშნული პროცესი იელის ჰუმანიტარული კვლევების ლაბორატორიის მიერ მომზადებულ ანგარიშშია დოკუმენტირებული.

სამშაბათს ზელენსკის ადმინისტრაციის მაღალჩინოსანმა, ოლეგ ტატაროვმა „ფორუმს“ წერილი გაუგზავნა, სადაც აღნიშნულია, რომ მათი მიმართვა პროკურატურას გადაეგზავნა. უწყებას ეთხოვა, სამართლებრივი საფუძვლის გამოკვეთის შემთხვევაში, „შესაბამისი რეაგირების ზომები მიიღოს“.