ევროკავშირი უკრაინას 6.1 მილიარდ ევროს გამოუყოფს - თანხა Patriot-ის რაკეტების შეძენასაც მოხმარდება

ევროკავშირი უკრაინას დამატებით 6.1 მილიარდი ევროს ოდენობის დახმარებას გამოუყოფს. აღნიშნული თანხა ქვეყანას სამხედრო აღჭურვილობის, მათ შორის "Patriot"-ის საჰაერო თავდაცვის რაკეტების შეძენაში დაეხმარება, რომლებიც რუსული დამანგრეველი ბალისტიკური რაკეტების ჩამოსაგდებად კრიტიკულად აუცილებელია - ინფორმაციას Euronews-ი ავრცელებს.

პარასკევს დაანონსებული დაფინანსება ევროკავშირის 90-მილიარდიანი საკრედიტო პაკეტიდან გამოიყოფა, რომელიც მიმდინარე წელს სამხედრო დახმარებისთვის 28.3 მილიარდ ევროს, ხოლო საბიუჯეტო დახმარებისთვის 16.7 მილიარდ ევროს ითვალისწინებს.

კრედიტის პირობებიდან მოიხსნება მოთხოვნა "დამზადებულია ევროპაში", რათა შესაძლებელი გახდეს აშშ-ში წარმოებული "Patriot"-ის სისტემებისა და იმ დრონების შესყიდვა, რომლებიც ჩინურ კომპონენტებზეა დამოკიდებული.

ახლად გამოყოფილი 6.1 მილიარდი ევრო წარმოადგენს ბოლო ტრანშს 28.3-მილიარდიანი პაკეტის ფარგლებში. გადახდები ეტაპობრივად განხორციელდება მას შემდეგ, რაც ბრიუსელი გადაამოწმებს და დაადასტურებს კიევის მიერ კერძო კომპანიებთან გაფორმებულ კონტრაქტებს.

დღემდე თავდაცვის მიზნებისთვის უკვე გადარიცხულია 8.35 მილიარდი ევრო.

უკრაინის პრეზიდენტის, ვოლოდიმირ ზელენსკის შეფასებით, მის არმიას ზამთრის უსაფრთხოდ გადასატანად "Patriot"-ის დაახლოებით 300 რაკეტა-გადამტაცი დასჭირდება.

ამერიკული თავდაცვითი გიგანტის, "Lockheed Martin"-ის მიერ წარმოებული "PAC-3" ტიპის რაკეტების დეფიციტმა მნიშვნელოვნად შეზღუდა კიევის შესაძლებლობა, ეფექტურად მოიგერიოს რუსული ბალისტიკური რაკეტები. მოსკოვმა ეს სისუსტე იერიშების გასაძლიერებლად გამოიყენა.

ახლო აღმოსავლეთში მიმდინარე კონფლიქტმა კიდევ უფრო გაართულა ისედაც გადატვირთული საწარმოო ჯაჭვები. ერთი "PAC-3" რაკეტის წარმოებას 24 თვე სჭირდება, მისი ღირებულება კი დაახლოებით 4 მილიონი დოლარია (3.45 მილიონი ევრო).

პროცესის დასაჩქარებლად ბრიუსელი ცდილობს დაარწმუნოს წევრი ქვეყნები, რომლებსაც თავიანთ მარაგებში ჯერ კიდევ აქვთ "Patriot"-ის რაკეტები, გადასცენ ისინი უკრაინას და მოგვიანებით ჩაანაცვლონ 2027 წლისთვის დაგეგმილი მიწოდებებით.