რევაზ სოხაძე: ჩვენი მიზანია ქართული სამშენებლო კომპანიები საერთაშორისო ბაზარზე კონკურენტუნარიან მოთამაშეებად ვაქციოთ
ინფრასტრუქტურის მინისტრის, რევაზ სოხაძის განცხადებით, სამინისტროს მთავარი ამოცანა მხოლოდ თანამედროვე ინფრასტრუქტურის მშენებლობა არ არის, არანაკლებ მნიშვნელოვანია ძლიერი ქართული სამშენებლო კომპანიების განვითარება, რომლებიც მომავალში საერთაშორისო ბაზარზეც შეძლებენ კონკურენციას. ინფორმაციას ინფრასტრუქტურის სამინისტრო ავრცელებს.
მინისტრის თქმით, სახელმწიფო ინფრასტრუქტურულ პროექტებზე ხარისხის მიმართ უკომპრომისო პოლიტიკას გააგრძელებს, რაც კომპანიებს კიდევ უფრო მაღალი სტანდარტების დამკვიდრებისკენ უბიძგებს.
„შესაძლოა, გარკვეულ შემთხვევებში გამოწვევა კომპეტენციის ნაკლებობაც იყოს, თუმცა თამაშის წესებს სახელმწიფო ადგენს. როდესაც ხარისხის მიმართ ჩვენი მოთხოვნები ყველასთვის მკაფიო და უცვლელი იქნება, კომპანიებიც ამ სტანდარტების შესაბამისად იმოქმედებენ. მიხარია, თუ ამ პროცესში ქართული კომპანიები სწრაფად გაძლიერდებიან“, - განაცხადა რევაზ სოხაძემ.
მინისტრის განცხადებით, საქართველომ წლების განმავლობაში საერთაშორისო გამოცდილება დააგროვა, ხოლო დღეს უკვე დროა, ეს გამოცდილება ქვეყნის კონკურენტულ უპირატესობად იქცეს.
„საქართველოში არაერთი უნიკალური ინფრასტრუქტურული პროექტი ხორციელდება. ეს არის გამოცდილება, რომელიც ქართულმა კომპანიებმა უნდა დააგროვონ, რათა მომავალში წარმატებით იმუშაონ არა მხოლოდ საქართველოში, არამედ საერთაშორისო ბაზრებზეც. თუ დღეს უცხოური კომპანიები წარმატებით საქმიანობენ საქართველოში, დარწმუნებული ვარ, დადგება დრო, როდესაც ქართული კომპანიებიც შეძლებენ სხვა ქვეყნებში მსხვილი ინფრასტრუქტურული პროექტების განხორციელებას“, - აღნიშნა მინისტრმა.
რევაზ სოხაძის თქმით, ეს პროცესი მარტივი არ არის, თუმცა ინფრასტრუქტურის სამინისტრო ბიზნესს პარტნიორად განიხილავს და მზად არის, ყველა პრობლემასა და ხარვეზზე ღიად იმუშაოს.
„ჩვენთვის მნიშვნელოვანია არა მხოლოდ ბიზნესისგან მაღალი ხარისხის მოთხოვნა, არამედ საკუთარი საქმიანობის მუდმივი გაუმჯობესებაც. თუ პროცესებში ხარვეზებს ვხედავთ, მათ გამოსწორებაზე დაუყოვნებლივ ვმუშაობთ. სწორედ სახელმწიფოსა და ბიზნესის პარტნიორობით შევძლებთ ძლიერი ქართული სამშენებლო სექტორის ჩამოყალიბებას“, - განაცხადა მინისტრმა.
