რობერტ ფიცო: თუ უკრაინის პრეზიდენტი დაინტერესებულია პუტინთან შეხვედრით, მან თავის რუს კოლეგას ტელეფონით უნდა დაუკავშირდეს
სლოვაკეთის პრემიერ-მინისტრმა რობერტ ფიცომ განაცხადა, რომ უკრაინის პრეზიდენტმა ვოლოდიმირ ზელენსკიმ რუსეთის პრეზიდენტ ვლადიმერ პუტინთან სატელეფონო საუბარი უნდა გამართოს, თუ პირისპირ შეხვედრა სურს. ფიცომ ეს განცხადება მოსკოვში პუტინთან შეხვედრიდან მეორე დღეს გააკეთა.
სლოვაკეთის პრემიერ-მინისტრის თქმით, პირადი საუბრისას ზელენსკიმ გამოთქვა მზადყოფნა პუტინს ნებისმიერ ფორმატში შეხვდეს.
„უკრაინის პრეზიდენტის, ვოლოდიმირ ზელენსკის გზავნილი რუსეთის პრეზიდენტს გადავეცი. სომხეთში ჩვენი პირადი შეხვედრისას ზელენსკიმ მითხრა, რომ მზად არის პუტინს ნებისმიერ ფორმატში შეხვდეს. პასუხი აშკარაა: თუ უკრაინის პრეზიდენტი დაინტერესებულია შეხვედრით, მან თავის რუს კოლეგას ტელეფონით უნდა დაუკავშირდეს“, - განაცხადა ფიცომ ვიდეომიმართვაში.
მან ასევე მხარი დაუჭირა აშშ-ის მიერ ინიციირებული სამდღიანი ზავის გაგრძელებას, რომელიც 9 მაისიდან მოქმედებს, თუმცა 10 მაისს რუსეთის მიერ უკრაინაზე განხორციელებული თავდასხმების სერიის შედეგად უკვე დაირღვა.
„მე ცეცხლის შეწყვეტას აბსოლუტურად აუცილებელი ვუწოდე იმისთვის, რათა შეიქმნას სივრცე ყველაზე მნიშვნელოვნისთვის - დიპლომატიური ძალისხმევისთვის, დიალოგისა და მოლაპარაკებებისთვის, რაც ათასჯერ უფრო სასარგებლოა, ვიდრე ერთმანეთის კვლა“, - დასძინა მან.
ფიცო იყო ევროკავშირის ერთადერთი ლიდერი, რომელიც მოსკოვში „გამარჯვების დღის“ აღსანიშნავად ჩავიდა, თუმცა უშუალოდ აღლუმს არ დასწრებია.
