რუსთავში ლომოურისა და მელიქიშვილის ქუჩების გასასვლელებს რეაბილიტაცია ჩაუტარდება
რუსთავის მერია საგზაო ინფრასტრუქტურის მოწესრიგების მიზნით, მელიქიშვილისა და ლომოურის ქუჩების გასასვლელების რეაბილიტაციას იწყებს.
ინფრასტრუქტურული პროექტი, მოსახლეობას, რუსთავის მერმა ნინო ლაცაბიძემ, საკრებულოს მაჟორიტარ დეპუტატ გიორგი ტუხაშვილთან, მერიის ინფრასტრუქტურის სამსახურისა და კომპანია GWP-ის წარმომადგენლებთან ერთად გააცნო.
„რუსთავის მერიის გუნდი ლომოურისა და მელიქიშვილის ქუჩების გასასვლელებში, ახალი საგზაო ინფრასტრუქტურის მოწყობას ვიწყებთ. ამ უბანში, საგზაო ინფრასტრუქტურა და სანიაღვრე ქსელი არ არსებობდა, რაც მოსახლეობას სერიოზულ დისკომფორტს უქმნიდა. სამუშაოებს ძალიან მალე დავიწყებთ, ასფალტის საფარი დაიგება და ახალი სანიაღვრე ქსელიც მოეწყობა. კომპანია GWP წყლისა და წყალარინების სისტემის სრულ რეაბილიტაციას განახორციელებს. მოსახლეობისთვის დისკომფორტის შემცირების მიზნით, საგზაო სამუშაოებს წყალმომარაგების ქსელის რეაბილიტაციის პარალელურად დავიწყებთ“, - განაცხადა რუსთავის მერმა ნინო ლაცაბიძემ.
ლომოურისა და მელიქიშვილის ქუჩების გასასვლელებში 31 100 კვადრატულ მეტრ ფართობზე, ასფალტის ახალი საფარი დაიგება და 7900 მეტრი სიგრძის ახალი სანიაღვრე ქსელი მოეწყობა.
კომპანია GWP კი წყლისა და წყალარინების სისტემის რეაბილიტაციისთვის ტერიტორიას უკვე ამზადებს. აღნიშნულ ქუჩებზე, წყალმომარაგების 2.1 კმ-ისა და წყალარინების 5 კმ-მდე სიგრძის ქსელი განახლდება, მოეწყობა 6 ერთეული სახანძრო ჰიდრანტი და 21 ერთეული ჩამკეტ-მარეგულირებელი ურდული. წყალმომარაგების კომპანიის პროექტის ჯამური საინვესტიციო ღირებულება, 3.5 მილიონი ლარია.
საგზაო სამუშაოების ღირებულება 4 819 198 ლარია. პროექტი სახელმწიფო და ადგილობრივი ბიუჯეტიდან ფინანსდება.
ინფორმაციას რუსთავის მერია ავრცელებს.
