საბურთალოს რაიონში ონიაშვილის ქუჩის სრული რეაბილიტაცია მიმდინარეობს

საბურთალოს გამგეობა ონიაშვილის ქუჩის რეაბილიტაციას ახორციელებს, - ამის შესახებ თბილისის მერმა კახა კალაძე მუნიციპალიტეტის მთავრობის დღევანდელ სხდომაზე განაცხადა.

მისივე განმარტებით, აღნიშნულ ტერიტორიაზე არაერთი საგზაო დაზიანება შეინიშნებოდა, რის გამოც მთლიანი ქუჩის რეაბილიტაცია დაიგეგმა.

„პროექტის ფარგლებში, 9 000 კვ.მ ფართობზე ასფალტის საფარის, ტროტუარისა და ბორდიურის რეაბილიტაცია იგეგმება. გარდა ამისა, შეიცვლება არსებული დაზიანებული წყლის მილები. პროექტის ღირებულება, დაახლოებით, 700 000 ლარია“, - განაცხადა კახა კალაძემ.

მისივე თქმით, მსგავსი პროექტების განხორციელება წარმოუდგენელია შეზღუდვებისა და დისკომფორტის გარეშე, რასაც ადგილობრივი მოსახლეობა გაგებით უნდა მოეკიდოს.

„მიმდინარე სამუშაოების გამო, ონიაშვილის ქუჩაზე საავტომობილო მოძრაობა ორივე მიმართულებით შეიზღუდა, რაც რეაბილიტაციის დასრულებამდე იმოქმედებს. მინდა, საზოგადოებას ბოდიში მოვუხადო. ყველაფერს გავაკეთებთ, რომ დროულად დასრულდეს სამუშაოები, რის შედეგადაც გადაადგილება უსაფრთხო და კომფორტული გახდება“, - აღნიშნა კახა კალაძემ.