სანქტ-პეტერბურგში, ირანის საგარეო საქმეთა მინისტრისა და რუსეთის პრეზიდენტის შეხვედრა გაიმართა

რუსეთი მზად არის მაქსიმუმი გააკეთოს იმისათვის, რომ ახლო აღმოსავლეთში მშვიდობა რაც შეიძლება მალე დამყარდეს. ამის შესახებ რუსეთის პრეზიდენტმა, ვლადიმირ პუტინმა ირანის საგარეო საქმეთა მინისტრთან, აბას არაღჩისთან შეხვედრაზე განაცხადა.

თავის მხრივ, ირანის საგარეო უწყების ხელმძღვანელმა აღნიშნა, რომ მოსკოვისა და თეირანის ურთიერთობები სტრატეგიულ პარტნიორობას წარმოადგენს და კიდევ უფრო განმტკიცდება.

პუტინმა აღნიშნა, რომ გასულ კვირას მიიღო გზავნილი ირანის უზენაესი ლიდერისგან, მოჯთაბა ხამენეისგან. მან არაღჩის სთხოვა, ხამენეისთვის მადლობა და კეთილი სურვილები გადაეცა.

რუსეთის ლიდერის თქმით, ირანელი ხალხი „მამაცურად და გმირულად“ იბრძვის საკუთარი სუვერენიტეტისთვის.

მისივე თქმით, რუსეთი იმედოვნებს, რომ ირანი წარმატებით გაივლის „გამოცდების ამ რთულ პერიოდს“ და მშვიდობა დაისადგურებს.

პუტინმა ხაზი გაუსვა, რომ მოსკოვს განზრახული აქვს გააგრძელოს ირანთან სტრატეგიული ურთიერთობების განვითარება.

აბას არაღჩიმ განაცხადა, რომ მოხარულია სანქტ-პეტერბურგში პუტინთან შეხვედრით და მას ირანის უზენაესი ლიდერისა და პრეზიდენტ მასუდ პეზეშკიანის კეთილი სურვილები გადასცა.

მინისტრის თქმით, ირანელმა ხალხმა საკუთარი სიმამაცით შეძლო აშშ-ის აგრესიისთვის წინააღმდეგობის გაწევა და „მომავალშიც გაუძლებს“.

არაღჩიმ მადლობა გადაუხადა პუტინს და რუსეთს ისლამური რესპუბლიკის მხარდაჭერისთვის.

მან აღნიშნა, რომ მოსკოვისა და თეირანის ურთიერთობები არის „უმაღლესი დონის სტრატეგიული პარტნიორობა“, რომელიც განვითარდება „მიუხედავად ყველაფრისა, რაც ხდება“.