საპატრულო პოლიციის დეპარტამენტი: დეპარტამენტის სახელით მოქალაქეებს ეგზავნება ტექსტური შეტყობინებები, რომ თითქოს ისინი დაჯარიმდნენ, შეტყობინებას თან ახლავს ბმულიც - აღნიშნული შეტყობინებები დეპარტამენტის მხრიდან არ არის გაგზავნილი, მოქალაქეებს მოვუწოდებთ არ შეასრულონ შეტყობინებაში მითითებული ინსტრუქცია

საპატრულო პოლიციის დეპარტამენტი მათი სახელით მოქალაქეებისთვის გაგზავნილ მოკლე ტექსტურ შეტყობინებებთან დაკავშირებით განცხადებას ავრცელებს და აღნიშნავს, რომ ეს შეტყობინებები დეპარტამენტის მიერ არ არის გაგზავნილი.

„შინაგან საქმეთა სამინისტროს საპატრულო პოლიციის დეპარტამენტის სახელით მოქალაქეების ნაწილს ეგზავნება მოკლე ტექსტური შეტყობინებები, რომ თითქოს ისინი დაჯარიმდნენ საგზაო მოძრაობის წესის დარღვევისთვის, კერძოდ, სიჩქარის გადაჭარბებისთვის, მოკლე ტექსტურ შეტყობინებას თან ახლავს ბმულიც. მოქალაქეების ინფორმირების მიზნით გვსურს განვმარტოთ, რომ აღნიშნული შეტყობინებები საპატრულო პოლიციის დეპარტამენტის მხრიდან არ არის გაგზავნილი, მოვუწოდებთ არ შევიდნენ შეცდომაში და არ შეასრულონ შეტყობინებაში მითითებული ინსტრუქცია. დამატებითი ინფორმაციისთვის შეგიძლიათ მიმართოთ საპატრულო პოლიციის ერთიანი მომსახურების ცენტრს. ასევე, ვაცხადებთ, რომ აღნიშნული ფაქტი შესწავლილი იქნება შესაბამისი სამსახურის მიერ", - აღნიშნულია განცხადებაში.