საფრანგეთის ნაკრებმა მაროკო დაამარცხა და მსოფლიო ჩემპიონატის ნახევარფინალში გავიდა

ბოსტონში გამართულ მსოფლიო ჩემპიონატის მეოთხედფინალურ დაპირისპირებაში საფრანგეთის ეროვნულმა ნაკრებმა მაროკოს ნაკრები ანგარიშით 2:0 დაამარცხა.

მატჩის ბედი მეორე ტაიმში გადაწყდა: მე-60 წუთზე ანგარიში კილიან მბაპემ გახსნა, ხოლო 66-ე წუთზე უსმან დემბელემ უპირატესობა გაზარდა. შეხვედრის პირველ ნახევარში მბაპემ პენალტის გატანა ვერ შეძლო, ხოლო 77-ე წუთზე მინდორი ტრავმის გამო დატოვა.

სტატისტიკურ პორტალ Opta-ზე დაყრდნობით, დემბელეს გოლში ასისტენტის როლის შესრულებით, მბაპემ მიმდინარე ჩემპიონატზე თავისი შედეგიანი მოქმედებების რაოდენობა 10-მდე აიყვანა. ის გახდა ერთადერთი ფეხბურთელი ტურნირის ისტორიაში, რომელმაც ორ სხვადასხვა მსოფლიო პირველობაზე შეძლო ამ ნიშნულის მიღწევა. ამჟამად კილიან მბაპეს მსოფლიო ჩემპიონატების ისტორიაში სულ 20 გოლი უგროვდება და ბომბარდირთა სიაში მხოლოდ არგენტინელ ლიონელ მესის ჩამორჩება, რომლის ანგარიშზეც 21 გოლია.

ნახევარფინალში, რომელიც 14 ივლისს გაიმართება, საფრანგეთის ნაკრები ესპანეთისა და ბელგიის დაპირისპირებაში გამარჯვებულს შეხვდება.

ცნობისთვის, წლევანდელი მსოფლიო ჩემპიონატი ისტორიაში პირველად 48 გუნდის მონაწილეობით, აშშ-ის, კანადისა და მექსიკის მასპინძლობით ტარდება. ტურნირი 19 ივლისს დასრულდება.