„საქართველოს ალიანსი უსაფრთხო გზებისთვის“ თავმჯდომარე ავტოსაგზაო შემთხვევებზე: კანონის დაუცველობას მივყავართ იქამდე, რომ ხდება მძიმე შედეგებით დასრულებული შემთხვევები - სიჩქარის გადაჭარბება არის ის ერთ-ერთი წამყვანი ფაქტორი, რომელიც საგზაო შემთხვევებს ასრულებს ლეტალურად და მძიმე შედეგებით

ორგანიზაციის - „საქართველოს ალიანსი უსაფრთხო გზებისთვის“ თავმჯდომარე ეკა ლალიაშვილი „იმედის კვირასთან“ ავტოსაგზაო შემთხვევების ძირითად მიზეზებზე საუბრობს. ის აღნიშნავს, რომ ერთ-ერთი მთავარი ფაქტორი სიჩქარის გადაჭარბებაა.

„კანონის დაუცველობასა და უგულებელყოფას მივყავართ იქამდე, რომ ხდება მძიმე შედეგებით დასრულებული შემთხვევები და თუ ჩვენ გადავხედავთ ჩვენს სტატისტიკას - წამყვანი ფაქტორები არის სიჩქარის გადაჭარბება, არასწორი მანევრირება, საპირისპირო ზოლში გადასვლა და მოძრაობის გაგრძელება. სიჩქარის გადაჭარბება არის ის ერთ-ერთი წამყვანი ფაქტორი, ძალიან მნიშვნელოვანი, რომელიც საგზაო შემთხვევებს ასრულებს ლეტალურად და მძიმე შედეგებით“, - განაცხადა ეკა ლალიაშვილმა.

მან შესაძლო პრევენციული ღონისძიებებზეც ისაუბრა.

„მნიშვნელოვანია, ვისაუბროთ პრევენციულ საგანმანათლებლო კამპანიებზე, რომლებიც ძალიან ეხმარება იმას, რომ საზოგადოებამ კიდევ უფრო გააცნობიეროს, თუ რატომ არ უნდა გადავაჭარბო სიჩქარეს მგზავრობის დროს, მაინც და მაინც ზებრა-გადასასვლელზე რატომ უნდა გადავიდეთ და რატომ უნდა ვიყოთ ისეთი საგზაო მოძრაობის მონაწილენი, რომელშიც ვზრუნავთ ერთმანეთზე.

ქვეყანაში გვაქვს ქულათა სისტემა, რომელიც ასევე შეიძლება, გამოვიყენოთ უფრო ეფექტიანად სიჩქარის გადაჭარბების პრევენციისთვის. მნიშვნელოვანია, რომ უკვე შემდეგ ეტაპზე გადავიდეთ და არა პოლიციის მიერ მოხდეს აღსრულება, არამედ კამერების მეშვეობით“, - აღნიშნა ეკა ლალიაშვილმა.

როგორც ცნობილია, ადმინისტრაციულ სამართალდარღვევათა კოდექსში დაგეგმილი ცვლილებების მიხედვით, სიჩქარის მცირე და საშუალო გადამეტების შემთხვევაში ჯარიმები მნიშვნელოვნად შემცირდება, ხოლო მაღალი სიჩქარით მოძრაობისთვის მოქმედი მკაცრი სანქციები ძალაში დარჩება.