საქართველოსა და სერბეთს შორის თავისუფალი ვაჭრობის შესახებ შეთანხმებაზე მოლაპარაკებების პირველი რაუნდი სერბეთში გაიმართა

საქართველოს მთავრობასა და სერბეთის რესპუბლიკის მთავრობას შორის თავისუფალი ვაჭრობის შესახებ შეთანხმებაზე (FTA) მოლაპარაკებების პირველი რაუნდი სერბეთში, ქალაქ ბელგრადში გაიმართა.

საქართველოს ეკონომიკისა და მდგრადი განვითარების სამინისტროს ინფორმაციით, საქართველოს მხრიდან მომლაპარაკებელ ჯგუფს ხელმძღვანელობდა ეკონომიკისა და მდგრადი განვითარების მინისტრის მოადგილე გენადი არველაძე, სერბეთის მხრიდან კი - სერბეთის შიდა და საგარეო ვაჭრობის მინისტრის მოადგილე ოლივერა იოციჩი.

შეხვედრაზე მხარეებმა ყურადღება გაამახვილეს საქართველოსა და სერბეთს შორის არსებულ მეგობრულ ურთიერთობებსა და ეკონომიკური თანამშრომლობის კიდევ უფრო გაღრმავების მნიშვნელობაზე.

საქართველოს ეკონომიკისა და მდგრადი განვითარების მინისტრის მოადგილის გენადი არველაძის შეფასებით, დელეგაციებმა მოლაპარაკების პირველივე რაუნდზე მნიშვნელოვან პროგრესს მიაღწიეს. “ჩვენი მოლოდინია, რომ მოლაპარაკებები სერბეთის მხარესთან მიმდინარე წლის სამ კვარტალში წარმატებით დასრულდება. თავისუფალი ვაჭრობის შესახებ შეთანხმება ხელს შეუწყობს ორმხრივი ვაჭრობისა და ინვესტიციების ზრდას, ბიზნესებისთვის ახალი შესაძლებლობების შექმნას და ეკონომიკური პარტნიორობის გაძლიერებას. ამასთან, ქართულ ბიზნესს გაეხსნება 6,6 მლნ-იანი ბაზარი, სადაც შესაძლებელი იქნება თავისუფალი ვაჭრობის რეჟიმით შეიტანონ პროდუქცია, ითანამშრომლონ ადგილობრივ ბიზნესთან და მოიზიდონ ინვესტიციები, რაც, საბოლოო ჯამში, დადებითად აისახება ორი ქვეყნის ეკონომიკურ კავშირებზე,” - აღნიშნა გენადი არველაძემ.

მოლაპარაკებების ფარგლებში მხარეებმა განიხილეს შეთანხმების ძირითადი მიმართულებები, მათ შორის: საქონლით ვაჭრობა, მომსახურებით ვაჭრობა, წარმოშობის წესები, საბაჟო პროცედურები და ვაჭრობის გამარტივება, ტექნიკური ბარიერები ვაჭრობაში (TBT), ციფრული ვაჭრობა, სატელეკომუნიკაციო მომსახურებები, ინტელექტუალური საკუთრების უფლებები, სავაჭრო დაცვის ზომები, დავების გადაწყვეტის მექანიზმები, ასევე სამართლებრივი და ინსტიტუციური საკითხები.

მხარეებმა დაადასტურეს მზადყოფნა, მოლაპარაკებები წარმართონ კონსტრუქციულ, ეფექტიან და შედეგზე ორიენტირებულ რეჟიმში. აღინიშნა, რომ საქართველოს აქვს თავისუფალი ვაჭრობის შეთანხმებებზე მოლაპარაკებების წარმატებით და მოკლე ვადებში დასრულების მნიშვნელოვანი გამოცდილება, რაც ქმნის პოზიტიურ მოლოდინს სერბეთთან მიმდინარე პროცესის მიმართაც.