სერბეთის პარლამენტის თავმჯდომარე: ევროკავშირის ბოლოდროინდელი მიდგომა გაფართოების მიმართ უსამართლოა
სერბეთის პარლამენტის თავმჯდომარე აცხადებს, რომ ევროკავშირის ბოლოდროინდელი მიდგომა გაფართოების მიმართ უსამართლოა. მისი თქმით, თამაშის წესები შეიცვალა მას შემდეგ, რაც სერბეთმა 2014 წელს გაწევრიანების შესახებ მოლაპარაკებები დაიწყო.
„ევროკავშირი გაფართოების მიმართ საკუთარ პოზიციას ცვლის და აშკარაა, რომ ეს თემა სულ უფრო აქტუალური ხდება“, - განუცხადა POLITICO-ს GLOBSEC-ის ფორუმზე ქვეყნის ეროვნული ასამბლეის პრეზიდენტმა და ყოფილმა პრემიერ-მინისტრმა, ანა ბრნაბიჩმა.
მისი თქმით, ეს ცვალებადი პოზიცია განსაკუთრებით თვალსაჩინო უკრაინაში რუსეთის შეჭრის კონტექსტში გახდა.
„როდესაც ჩვენ ეს თამაში დავიწყეთ... ჯერ კიდევ 2014 წელს... საერთო საგარეო და უსაფრთხოების პოლიტიკასთან თანდათანობითი დაახლოება იყო გათვალისწინებული, ხოლო სრულად, 100 პროცენტით, ევროკავშირში შესვლამდე უნდა ვყოფილიყავით მასთან შესაბამისობაში. ახლა თამაშის ეს წესები შეიცვალა, რაც, ჩემი აზრით, სამართლიანი ნამდვილად არ არის“, - განაცხადა მან.
ბრნაბიჩის თქმით, ამავდროულად, დასავლეთ ბალკანეთის სხვა ქვეყნებმა, როგორიცაა ალბანეთი და მონტენეგრო, პროგრესს მიაღწიეს ევროკავშირში გაწევრიანების მოლაპარაკებებში, მაშინ როცა სერბეთის მოლაპარაკებები შეფერხდა. მისი განცხადებით, ეს იმის გამო კი არ ხდება, რომ სერბეთი მზად არ არის, არამედ იმიტომ, რომ ქვეყანა „სრულად არ არის თანხვედრაში ევროკავშირის საგარეო და უსაფრთხოების პოლიტიკასთან“.
ყოფილი პრემიერ-მინისტრი ასევე მიიჩნევს, რომ ნარატივი სერბეთში დემოკრატიის უკუსვლის შესახებ უსამართლოა. იგი ამტკიცებს, რომ ქვეყანა სწორედ ამავე მიზეზით გახდა განსაკუთრებული კრიტიკის სამიზნე.
„საინტერესოა, რომ ალბანეთში მომიტინგეების წინააღმდეგ ცრემლსადენი გაზი და წყლის ჭავლი გამოიყენეს, თუმცა ხმა არავის ამოუღია“, - განაცხადა ბრნაბიჩმა ოპოზიციის მიერ ორგანიზებულ ბოლოდროინდელ საპროტესტო აქციებზე საუბრისას, რომლებსაც დემონსტრანტებსა და პოლიციას შორის შეტაკებები მოჰყვა. „და რატომ ხდება ასე? ჩემი აზრით, იმიტომ, რომ ალბანეთი 100 პროცენტით არის თანხვედრაში საერთო საგარეო და უსაფრთხოების პოლიტიკასთან, რის გამოც, თქვენ [ევროკავშირი] ყველაფერზე თვალს ხუჭავთ. მაშინ როცა, სერბეთის შემთხვევაში, თქვენ საკმაოდ დიდწილად ავრცელებთ ცრუ ნარატივებს და სრულიად განსხვავებულ სტანდარტებს იყენებთ“.
