შალვა პაპუაშვილი: 2022 წელსაც ვიღაცას უნდოდა, რომ ჩვენ კვლავ პაიკი გავმხდარიყავით, კვლავ შევსულიყავით სამხედრო დაპირისპირებასა და ომში

საქართველოს პარლამენტის თავმჯდომარის შალვა პაპუაშვილის განცხადებით, 2022 წელს, როცა რუსეთ-უკრაინის ომი დაიწყო, ვიღაცას სურდა, რომ საქართველოც შესულიყო სამხედრო დაპირისპირებაში და კვლავ პაიკი გამხდარიყო, როგორც ეს 2008 წელს მოხდა.

პაპუაშვილის განცხადებით, 2022 წელს ხელისუფლებაში „ქართული ოცნების“ ნაცვლად, „ნაციონალური მოძრაობა“ ან მისი მსგავსი პოლიტიკური ძალა რომ ყოფილიყო, ომი გარდაუვალი იქნებოდა.

„2022 წელსაც ვიღაცას უნდოდა, რომ ჩვენ კვლავ პაიკი გავმხდარიყავით, კვლავ შევსულიყავით სამხედრო დაპირისპირებასა და ომში. მაშინ, როდესაც მეორე მსოფლიო ომის შემდეგ ევროპის კონტინენტზე ყველაზე დიდი ომი დაიწყო და მაშინაც 2022 წელს „ქართული ოცნების“ ნაცვლად ხელისუფლებაში რომ ყოფილიყო ეს აქტივისტი პოლიტიკური წარმონაქმნები „ნაციონალური მოძრაობის“, დღევანდელი აქტივისტთა ჯგუფების სახით, მაშინაც აუცილებლად იქნებოდა ომი და დღეს ჩვენ ვიქნებოდით ნაომარი, დანგრეული ქვეყანა“, - თქვა პაპუაშვილმა.