შალვა პაპუაშვილი მარტა კოსის განცხადებაზე: მეორე ხარისხოვან ერად ყოფნას არავინ აპირებს. ამაზე ჩვენ ხელი არ მოგვიწერია და ამას არც კონსტიტუციის 78-ე მუხლი გულისხმობს, რომ ჩვენ, ჩვენი ერი მეორე ხარისხოვან ერად ვაქციოთ, რომელიმე გაერთიანებაში. ახლა მნიშვნელოვანია კანდიდატმა ქვეყნებმა საკუთარი ხმა გააერთიანონ და შეეწინააღმდეგონ ევროკავშირის ცივილიზაციურ უფსკრულისკენ გაქანებას

თქვენ დაქვემდებარებული და მეორე ხარისხოვანი ერი გინდათ იყოთ, რომელიმე გაერთიანებაში?!, - ასე მიმართა საქართველოს პარლამენტის თავმჯდომარემ ჟურნალისტს, რომელმაც მას ჰკითხა - შეიძლება თუ არა, რომ „ქართულმა ოცნებამ“ ევროკავშირში წევრობის თაობაზე განაცხადი უკან გამოიწვიოს.

საუბარია გაფართოების საკითხებში ევროკომისრის მარტა კოსის განცხადების საპასუხო ნაბიჯებზე, რომლითაც მედიის წარმომადგებლები დაინტერესდნენ.

შალვა პაპუაშვილის თქმით, ის, რაზეც ახლა ევროკავშირის მსჯელობს თანასწორობის შესახებ მისივე პრინციპებს ეწინააღმდეგება.

საქართველოს პარლამენტის თავმჯდომარის განცხადებით, მნიშვნელოვანია, რომ კანდიდატმა ქვეყნებმა საკუთარი ხმა გააერთიანონ.

„ევროკავშირის ასეთ გადაწყვეტილებებზე მსჯელობით და ფიქრით თავად სცდება ევროკავშირის ძირითად ღირებულებებს, რომელიც გულისხმობს თანასწორობას მისი წევრებისა.

[მარტა კოსის განცხადება] გულისხმობს, რომ არსებობს პირველი ხარისხოვანი ერები და მეორე ხარისხოვანი ერები. რა თქმა უნდა მეორე ხარისხოვან ერად ყოფნას არავინ არ აპირებს. ამაზე ჩვენ ხელი არ მოგვიწერია და ამას არც კონსტიტუციის 78-ე მუხლი გულისხმობს, რომ ჩვენ, ჩვენი ერი მეორე ხარისხოვან ერად ვაქციოთ, რომელიმე გაერთიანებაში.

ახლა მნიშვნელოვანია კანდიდატმა ქვეყნებმა საკუთარი ხმა გააერთიანონ და შეეწინააღმდეგონ ევროკავშირის ცივილიზაციურ უფსკრულისკენ გაქანებას. ეს პრობლემა მხოლოდ კანდიდატი ქვეყნებისთვის კი არ არის, ეს ნაბიჯ-ნაბიჯ აისახება წევრ ქვეყნებზე საბოლოო ჯამში. წევრ ქვეყნებში მოხდება ეს სეგრეგაცია, სადაც დიდი ერები პატარა ერების უფრო სწორად პირველ ხარისხოვანი ერები, მეორე ხარისხოვან ერების საკითხს გადაწყვეტენ. ამიტომ დღეს საშველია ევროკავშირი იმისთვის, რომ საბოლოოდ არ გადაეშვას ცივილიზაციურ უფსკრულში“, - განაცხადა შალვა პაპუაშვილმა.