შალვა პაპუაშვილი: პრემიერის შეხვედრა დიუშენით დაავადებული ბავშვების მშობლებთან ადასტურებს, რომ როგორც პრემიერი, ისე მთლიანად სახელმწიფო ამ საკითხით დაინტერესებულია და არავინ არავის ჯინში არ უდგას
საქართველოს პარლამენტის თავმჯდომარე შალვა პაპუაშვილი პრემიერ-მინისტრისა და დიუშენით დაავადებული ბავშვების მშობლების შეხვედრას გამოეხმაურა. მისი თქმით, ეს შეხვედრა კიდევ ერთხელ ადასტურებს იმას, რომ როგორც პრემიერი, ასევე, სახელმწიფო დაინტერესებულია ამ საკითხით და არავინ არავის ჯინში არ უდგას.
პაპუაშვილის თქმით, მთავარია მიღებული იყოს ისეთი გადაწყვეტილება, რომელიც დიუშენით დაავადებული ბავშვებისთვის, საქართველოსთვის, სახელმწიფოსა და საზოგადოებისთვის სასარგებლო იქნება.
„ჩვენი მიდგომა კვლავ იგივეა. საქართველოს სახელმწიფოს ჯანდაცვის მიმართულება სწორედ „ქართულმა ოცნებამ" აიყვანა უფასო ჯანდაცვის სტანდარტზე. როდესაც მოსახლეობას შესაძლებლობა აქვს თავისი სამედიცინო საჭიროებები სახელმწიფოს ხარჯით და დაფინანსებით დაიკმაყოფილოს. მეორე მხრივ, იშვიათ დაავადებებზე საქართველოს სახელმწიფოს აქვს სპეციალური პროგრამა. 25 სახის იშვიათი დაავადების დაფინანსება ხდება. მიდგომა კვლავ ისეთია, რაზეც ჩვენ ვსაუბრობდით. სადაც არის რეალური, ხელშესახები შედეგები სახელმწიფო მზად არის განიხილოს და მიიღოს ეს გადაწყვეტილებები. ამაზე იყო მთელი ეს პერიოდი მსჯელობა და ჯანდაცვის სამინისტრო სწორედ ამ საკითხითაა დაკავებული, რომ შეხედოს ხომ არ არის მცდელობა, რომ გარკვეული პრეპარატების შესაძლებლობები გააბუქონ . არაერთი მაგალითი იყო ამის მოყვანილი და სწორედ ამის გამო პროფესიონალებზე და სამედიცინო სფეროს წარმომადგენლების დასკვნების საფუძველზე მიიღებს სახელმწიფო გადაწყვეტილებას ამ თუ სხვა საკითხზე. პრემიერის შეხვედრაც ადასტურებს, რომ როგორც პრემიერი, ისე მთლიანად სახელმწიფო ამ საკითხით დაინტერესებულია და არავინ არავის ჯინში არ უდგას. მთავარი არის ერთი რამე, რომ მათი შვილებისთვის, ჩვენი სახელმწიფოსა და საზოგადოებისთვის იყოს მიღებული ისეთი გადაწყვეტილება, რომელიც სასარგებლოა",- აღნიშნა პაპუაშვილმა.
ირაკლი კობახიძე დღეს დიუშენით დაავადებული ბავშვების მშობლებს შეხვდება
