შალვა პაპუაშვილი: რა თქმა უნდა, როდესაც ბრიუსელი გეუბნება, რომ დაუწესე სანქციები რუსეთს, ეს არის საქართველოში მშვიდობის წინააღმდეგ მიმართული ნაბიჯები, რომელსაც ჩვენ შევეწინააღმდეგეთ და ამის გამო გვსჯიან

„მგონი ვთანხმდებით იმაზე, რომ სომხეთი სხვა სახელმწიფოა, საქართველო სხვა სახელმწიფოა. ძალიან ცდებით თუ გგონიათ, რომ თითქმის ერთნაირი გამოწვევები გვაქვს“, - ასე უპასუხა საქართველოს პარლამენტის თავმჯდომარე შალვა პაპუაშვილმა ჟურნალისტის კითხვას, „რას ნიშნავს, როდესაც რეგიონის ორი ქვეყანა მშვიდობას და სუვერენიტეტს სხვადასხვა მიმართულებით ხედავს. თქვენ ვერ ხედავთ მშვიდობას, სუვერენიტეტს ევროკავშირის მხრიდან და ფაშინიანმა, სომეხმა ხალხმა სწორედ ამას მისცა ხმა“.

პაპუაშვილის თქმით, ორი სხვადასხვა სახელმწიფოა, სხვადასხვა წინა ისტორიით, სხვადასხვა გამოწვევით და ერთიანი ხედვით, რაც შეეხება მშვიდობას რეგიონში.

„ჩვენ მშვიდობას ვხედავთ საქართველოში და როდესაც ვხედავთ ჩვენ, რომ არის რისკი საქართველოში მშვიდობის შენარჩუნების, ამაზე ვსაუბრობთ. რა თქმა უნდა, როდესაც ბრიუსელი გეუბნება, რომ დაუწესე სანქციები რუსეთს, ეს არის საქართველოში მშვიდობის წინააღმდეგ მიმართული ნაბიჯები, რომელსაც ჩვენ შევეწინააღმდეგეთ და ამის გამო გვსჯიან.

მათ შორის, ამ ვიზალიბერალიზაციაზე დააკვირდით რა საკითხებს ითხოვენ. ითხოვენ ევროკავშირის სასანქციო პოლიტიკაზე სრულად მიერთებას. ანუ, ოთხი წელია ამისთვის ვწვალობთ და ამისთვის ვცდილობთ გავაგებინოთ სამყაროს, რომ საქართველოსთან ისეთი დამოკიდებულება, როგორც ნატო-ს წევრ ქვეყანასთან, შეუძლებელია? თვითონ არიან მშვიდად, შეფრინდება ერთი ჩიტი რუსეთიდან და ნატო-ს მთელი ძალები ვხედავთ რომ აქტიურდებიან. საქართველო არ არის ასეთი ქვეყანა. აი, ახლა კონკრეტულად ამას ითხოვს ბრიუსელი, რომ შევუერთდეთ სასანქციო პოლიტიკას.

ორმაგი სტანდარტით და ფარისევლად რომ მოქმედებს ბრიუსელი, ახლა გაიგეთ?

კიდევ ერთხელ, რაში გვაკრიტიკებენ. იმაში, რომ ჩვენ არ მივუერთდით ევროკავშირის სასანქციო პოლიტიკას რუსეთის წინააღმდეგ. მეორე, აკრიტიკებენ ჩვენს სავიზო პოლიტიკას, რომ გვაქვს უვიზო მიმოსვლა რუსეთთან. კარგი, რუსეთი გადავდოთ გვერდით, ჩინეთთან. ეს არ მოსწონს ევროკავშირს, რომ ჩინეთის მოქალაქეებს შეუძლიათ უვიზოდ ჩამოსვლა საქართველოში და სხვა ზოგიერთ ქვეყანასთან. ანუ, რა ვქნათ ახლა ჩვენ? სავიზო რეჟიმი შემოვიღოთ ჩინეთთან? ხელი არ შევუწყოთ ჩინეთიდან ტურისტების, ბიზნესის ჩამოსვლას და ამ აქტიურობებს იმის გამო, რომ ბრიუსელს აქვს სხვა წარმოდგენები? მესამე, ბრიუსელი ითხოვს რომ გვქონდეს კვლავაც, როგორც წარსულში, შესაძლებლობა, რათა საქართველოში გაუმჭვირვალედ დახარჯოს ფული პოლიტიკაში.

რა შუაშია ახლა გამაგებინეთ უვიზო მიმოსვლა ევროკავშირთან ამ ყველაფერთან. რა კავშირშია იმასთან, რომ ჩვენ ვამბობთ დიახ, ბრიუსელი თუ ხარჯავს საქართველოში ფულს, ქართველ ხალხს უნდა გააგებინოს, თუ რაში ხარჯავს ამ ფულს. ამიტომ, კიდევ ერთხელ, სინამდვილეში ყველა ეს პრეტენზია, რაც არსებობს საქართველოს უვიზო პოლიტიკასთან, საქართველოს სასანქციო პოლიტიკასთან, საქართველოს საკანონმდებლო პოლიტიკასთან, ყველა ეს არის შიდასახელმწიფოებრივი, ანუ სუვერენიტეტის საკითხი. ვიზალიბერალიზაცია, როგორც მარწყვი ისე არის წარმოდგენილი და გვთავაზობენ ჩვენ, რომ მარწყვზე გავცალოთ სუვერენიტეტი“, - აღნიშნა პარლამენტის თავმჯდომარემ.