შალვა პაპუაშვილი: რაც შეეხება კენჭისყრის დროს შეცდომით მხარდაჭერას, ეს საპარლამენტო ცხოვრების თანმდევი მოვლენაა, ასეთი რამ ხდება, როდესაც მიდის კენჭისყრა - მეორე დღეს ავირჩიეთ სახელმწიფო უსაფრთხოების სამსახურის ხელმძღვანელი თამაზ ბორაშვილი და მათ წითელ ღილაკს არ დააჭირეს ანუ ჩვენ დავასკვნათ ახლა, რომ გახარიას პარტიამ მხარი დაუჭირა ამ კანდიდატურას?

რაც შეეხება კენჭისყრის დროს შეცდომით მხარდაჭერას და ასე შემდეგ, ეს საპარლამენტო ცხოვრების თანმდევი მოვლენაა, ასეთი რამ ხდება, როდესაც მიდის კენჭისყრა, მათ შორის, განსაკუთრებით როცა შეიძლება, ოპოზიციის მხრიდან იყოს კანონპროექტი, - განაცხადა საქართველოს პარლამენტის თავმჯდომარემ უმრავლესობის წევრების მიერ „გახარია საქართველოსთვის“ ფრაქციის ინიციირებული საკანონმდებლო ცვლილების მხარდაჭერას კენჭისყრისას.

შალვა პაპუაშვილი აღნიშნავს, რომ გახარიას პარტიას პარლამენტში სულ 2-3 საკითხი აქვს კენჭისყრაზე გატანილი.

„რაც პარლამენტში არიან, გახარიას პარტიას ვგულისხმობ, მგონი სულ 2-3 საკითხი იყო კენჭისყრაზე გამოტანილი და ხშირად არ ხდება, რომ მათი კანონპროექტები არის [კენჭისყრაზე გატანილი].

ასეთი რაღაცები ხდება და პირველად არ მომხდარა. უბრალოდ, ახლა გახარიას ფანტაზიორობის მსხვერპლი ხართ თქვენ იმიტომ, რომ გახარია და ხაზარაძე შეთანხმდნენ, რომ სამი დღე უნდა ილაპარაკონ ამ ფანტაზიორობაზე.

შეიძლება, უყურადღებობა იყოს - იყო კანონპროექტები, რომლებიც იყო ინიციირებული „ქართული ოცნების“ მხრიდან, შემდეგ იყო მათი კანონპროექტი და შემდეგ ისევ მოდიოდა ჩვენი კანონპროექტები, ანუ შუაში იყო მათი კანონპროექტი და შეიძლება, იქ ადამიანმა ყურადღება ვერ მიაქციო, კონკრეტულად რომლის კენჭისყრა ხდება. სხვათა შორის, მე ვაფრთხილებ კიდეც, რომ ყურადღება მიაქციონ და შეცდომით არ მოხდეს [ხმის მიცემა], მაგრამ ყოველთვის ყურადღება რა არის ხოლმე დარბაზში. ასე რომ ასეთი რაღაცები ხდება, ოპოზიციასაც ეშლება, უმრავლესობასაც შეიძლება, შეეშალოს, უყურადღებობა შეიძლება იყოს და ასე შემდეგ“, - განაცხადა შალვა პაპუაშვილმა.

მან ასევე გაიხსენა, რომ სახელმწიფო უსაფრთხოების სამსახურის ხელმძღვანელის თანამდებობაზე თამაზ ბორაშვილის კანდიდატურის განხილვისას გახარიას პარტიის წარმომადგენლებს წითელ ღილაკზე ხელი არ დაუჭერიათ.

„„წინააღმდეგს“ რატომ არ დააჭირესო. ჩვენ მეორე დღეს ავირჩიეთ სახელმწიფო უსაფრთხოების სამსახურის ხელმძღვანელი თამაზ ბორაშვილი და მათ წითელ ღილაკს არ დააჭირეს ანუ ჩვენ დავასკვნათ ახლა, რომ გახარიას პარტიამ მხარი დაუჭირა ამ კანდიდატურას? ამ ადამიანების მთელი პრობლემა ის არის, რომ ფანტაზიორობენ. ვხედავთ, რომ გახარიას პარტიისა და ხაზარაძის ტელევიზიის გარდა ამ საკითხით არავინაა დაინტერესებული იმიტომ, რომ აბსოლუტური სისულელეა. იყვნენ ბედნიერები და თქვან, მხარი დაგვიჭირესო - „ქართულმა ოცნებამაც“, „ხალხის ძალამაც“.

რაც შეეხება შეფასებას, კანონპროექტის განხილვის ერთ-ერთი ნაწილია ფრაქციების გამოსვლა, „ქართული ოცნების“ სახელით გამოვიდა არჩილ გორდულაძე პროექტის განხილვის შემდეგ და მიწასთან გაასწორა ეს კანონპროექტი“, - აღნიშნა პარლამენტის თავმჯდომარემ.