შალვა პაპუაშვილი: სამხრეთ კავკასია არის მნიშვნელოვანი დამაკავშირებელი რგოლი ევროპასა და აზიას შორის ამიტომ გაუგებარია ევროკავშირის პოლიტიკა, რომელიც საკუთარ ფეხში სროლას ჰგავს, როდესაც ვხედავთ მათ დამოკიდებულებას საქართველოს მიმართ

სამხრეთ კავკასია არის მნიშვნელოვანი დამაკავშირებელი რგოლი ევროპასა და აზიას შორის და სწორედ ამიტომ არის გაუგებარი ევროკავშირის პოლიტიკა, რომელიც საკუთარ ფეხში სროლას ჰგავს, როდესაც ვხედავთ მათ დამოკიდებულებას, მაგალითად, საქართველოს მიმართ, - ასე გამოეხმაურა საქართველოს პარლამენტის თავმჯდომარე, ურსულა ფონდერლაიენის განცხადებას, რომ „სომხეთი „მნიშვნელოვან“ როლს ასრულებს, განსაკუთრებით სამხრეთ კავკასიისა და ცენტრალური აზიის დაკავშირებადობის საკითხში“.

შალვა პაპუაშვილის თქმით, ზოგადად ბრიუსელის პოლიტიკა არეულია და გლობალურ საკითხებში მას აზრს აღარავინ ეკითხება.

„მე ღრმა აზრებს ვერ ამოვიკითხავ ევროპელი ზოგიერთი პოლიტიკოსის განცხადებებში იმის გათვალისწინებით, რომ ზოგადად არეული არის ბრიუსელის პოლიტიკა გლობალურად, არა მხოლოდ საქართველოსთან დაკავშირებით. იცით, რომ აშშ-ს სახელმწიფო მდივანი არც კი ხვდება ევროკომისიის საგარეო წარმომადგენელ კალასს და ევროკავშირმა თავისი როლი გლობალურ პოლიტიკაში ფაქტობრივად სრულად დაკარგა. ვხედავთ, რომ აღარ ეკითხებიან დიდ საკითხებს, გლობალურ საკითხებს და რეგიონულ საკითხებშიც დიდად არ ეთქმით ხოლმე სიტყვა. ასე, რომ უპირველეს ყოვლისა ის, რომ საქართველოსთან ჰქონდეს დიალოგი ეს არის ევროკავშირის ინტერესში ვინაიდან საქართველო გახლავთ რგოლი, რომელიც აკავშირებს ევროკავშირს იმ რესურსებთან თუ მარშრუტებთან, რომელიც მნიშვნელოვანია ევროკავშირის ეკონომიკისთვის, რომელიც დღეს სტაგნაციას განიცდის“, - განაცხადა შალვა პაპუაშვილმა.