შალვა პაპუაშვილი: თუ საზოგადოება შეადარებს წინა ხელისუფლებას, ნახავს, რომ დრამატულად შემცირებულია საჩივრების რაოდენობა, რომელიც იგზავნება სტრასბურგის ადამიანის უფლებათა ევროპულ სასამართლოში

საქართველო ამ მხრივ არის სანიმუშო. შედარება შეგიძლიათ ნებისმიერი სახის მოიყვანოთ და ყველა შედარებაში საქართველო კარგ შედეგებს აჩვენებს, - განაცხადა საქართველოს პარლამენტის თავმჯდომარემ შალვა პაპუაშვილმა კითხვის პასუხად, თუ როგორ ასრულებს საქართველო ადამიანის უფლებათა ევროპული სასამართლოს გადაწყვეტილებებს.

მისივე თქმით, თუ საზოგადოება შეადარებს წინა ხელისუფლებას, ნახავს, რომ დრამატულად შემცირებულია საჩივრების რაოდენობა, რომელიც იგზავნება სტრასბურგის ადამიანის უფლებათა ევროპულ სასამართლოში.

„ეს ყველაფერი მეტყველებს იმაზე, რომ წინა ხელისუფლების დროს, რომელიც ბრიუსელის საყვარელი ხელისუფლება იყო, იყო ყველაზე მეტი საჩივარი და ყველაზე მეტი მარცხი. მას შემდეგ ვხედავთ, რომ შემცირებულია საჩივრები და ყველა საქმე, რომელიც იყო ე.წ. გახმაურებული, პოლიტიკურად მნიშვნელოვანი.

ყველგან დამარცხდნენ საქართველოს წინააღმდეგ, მათ შორის დამარცხდა ბრიუსელი, რომელიც დეზინფორმაციას ავრცელებდა საქართველოსთან დაკავშირებით, რომ თითქოს „რუსთავი 2“-ის საქმეზე, მელიასთან, სააკაშვილთან, გვარამიასთან, ახალაიასთან და სხვებთან ქართული მართლმსაჯულება იყო მართალი და მტყუანი იყო ყველა უცხოელი ელჩი და პოლიტიკოსი, რომელიც საქართველოს აბრალებდა დარღვევებს. საქართველო ამ მხრივ გამოირჩევა როგორც რეგიონში, ისე სხვა ქვეყნებთან მიმართებაში“, - აღნიშნა შალვა პაპუაშვილმა.