შვეიცარიაში მოსახლეობის რაოდენობაზე ზედა ზღვარის დაწესების საკითხზე რეფერენდუმი იმართება

შვეიცარიაში დღეს იმართება რეფერენდუმი, რომელზეც მოქალაქეებმა უნდა გადაწყვიტონ - დააწესონ თუ არა მოსახლეობის რაოდენობაზე 10-მილიონიანი ზღვარი. თუ შვეიცარიელები ინიციატივას მხარს დაუჭერენ, ქვეყანაში მცხოვრებთა ეს რაოდენობა 2050 წლამდე უნდა შენარჩუნდეს.

ამჟამად ქვეყანაში დაახლოებით 9,1 მილიონი ადამიანი ცხოვრობს, რომელთა 27% უცხოელია. მოსახლეობა საგრძნობლად გაიზარდა 2002 წლის შემდეგ, როდესაც მისი რაოდენობა 7,3 მილიონს შეადგენდა.

მუდმივ მცხოვრებთა რაოდენობის საკანონმდებლო დონეზე 10 მილიონზე დაბლა შენარჩუნების იდეა მემარჯვენე-კონსერვატიულ „შვეიცარიის სახალხო პარტიას“ (SVP) ეკუთვნის, რომელიც პარლამენტში ყველაზე მეტ - 200-დან 62 ადგილს ფლობს. პარტიამ ამას „მდგრადი განვითარების ინიციატივა“ უწოდა, რომელიც მიზნად ისახავს საცხოვრებელ ბაზარზე, საზოგადოებრივ სერვისებსა და გარემოზე ზეწოლის შემცირებას.

ყველა სხვა მსხვილი პარტია, მთავრობის წევრები, ბიზნესლიდერები და პროფკავშირები წინააღმდეგები არიან და ამ წინადადებას „ქაოსის ინიციატივა“ უწოდეს. მათი აზრით, ამან შესაძლოა საავადმყოფოები და სასტუმროები პერსონალის გარეშე დატოვოს, ზიანი მიაყენოს ევროკავშირთან ურთიერთობებს და შვეიცარია იზოლაციაში მოაქციოს.

ამავდროულად, ამომრჩევლებს აწუხებთ გადატვირთული მატარებლები, ძვირი ბინები და ჯანდაცვის ხარჯების ზრდა. ბოლო გამოკითხვების მიხედვით, ინიციატივის მომხრეთა და მოწინააღმდეგეთა რაოდენობა თითქმის თანაბარია - გამოკითხულთა 45% მხარს უჭერს წინადადებას, 52% კი არა, მნიშვნელოვან ნაწილს გადაწყვეტილება ჯერ კიდევ არ მიუღია.