სლოვაკეთის პრეზიდენტი უკრაინაზე: ვერ წარმომიდგენია ევროკავშირის გაფართოება იმ ქვეყნის ხარჯზე, რომელიც ამჟამად რუსეთთან ომშია, რადგან ეს, იმავდროულად, ნიშნავს ომის გადმოტანას ევროკავშირის ფარგლებს გარედან მისი საზღვრების შიგნით

სლოვაკეთის პრეზიდენტმა, პეტერ პელეგრინიმ განაცხადა, რომ ევროკავშირში უკრაინის გაწევრიანების შესახებ დისკუსიები მხოლოდ ომის დასრულების შემდეგ იქნება შესაძლებელი.

მან ასევე მხარი არ დაუჭირა კიევისთვის რაიმე სახის გამარტივებული პროცედურების გამოყენებას, რაც ჩრდილოეთ მაკედონიის პრეზიდენტთან ერთად გამართულ ერთობლივ პრესკონფერენციაზე აღნიშნა.

სლოვაკეთის პრეზიდენტის თქმით, მთავარ პრიორიტეტად კვლავ უკრაინაში ომის დიპლომატიური გზით დასრულება უნდა დარჩეს. მისი ხედვით, მხოლოდ სამართლიანი მშვიდობის მიღწევის შემდეგ შეიძლება დაიწყოს არსებითი მსჯელობა ევროკავშირის წევრობისკენ უკრაინის შემდგომი გზის შესახებ.

„პრიორიტეტი უნდა მიენიჭოს უკრაინაში კონფლიქტის დიპლომატიური საშუალებებით დასრულებას. ეს უნდა იყოს მთავარი პირობა იმ რეალურ ნაბიჯებზე დასალაპარაკებლად, რომლებიც უკრაინას ევროკავშირის წევრობასთან დააახლოებს“, - განაცხადა პელეგრინიმ.

ამავდროულად, მან უარი თქვა უკრაინისთვის რაიმე სახის გამონაკლისის დაშვებაზე ან გაწევრიანების დაჩქარებული მექანიზმების გამოყენებაზე. სლოვაკეთის პრეზიდენტმა ხაზგასმით აღნიშნა, რომ ომი არ უნდა გახდეს სხვა კანდიდატ ქვეყნებთან შედარებით განსაკუთრებული პირობების მინიჭების მიზეზი.

მისი აზრით, დასავლეთ ბალკანეთის ქვეყნებმა წლები დახარჯეს რთული რეფორმების განხორციელებაზე და გაიარეს გრძელი გზა ევროკავშირისკენ, ხოლო უკრაინისთვის წესების შეცვლა რეგიონისთვის ნეგატიური სიგნალი იქნება.

„არცერთ ქვეყანას, მიუხედავად იმისა, თუ რამდენად რთულია მისი მდგომარეობა, არ შეუძლია მიიღოს პრივილეგიები მხოლოდ ამ სიტუაციის - მაგალითად, ომის - გამო, დასავლეთ ბალკანეთის იმ ქვეყნებთან შედარებით, რომლებმაც რეფორმების მართლაც გრძელი და რთული გზა გაიარეს“, - დასძინა მან.

პელეგრინიმ ასევე აღნიშნა, რომ მხარს არ უჭერს უკრაინისთვის ევროკავშირის ასოცირებული ან ნაწილობრივი წევრობის იდეას. მან ხაზგასმით აღნიშნა, რომ გაფართოების პროცესს აქვს მკაფიო წესები, რომლებსაც გამონაკლისის გარეშე ყველა კანდიდატმა უნდა დაემორჩილოს.

„თუ უკრაინა მომავალში ოდესმე შეასრულებს ამ წესებსა და პირობებს, სლოვაკეთი მხარს დაუჭერს მის გზას ევროკავშირის წევრობისკენ, მაგრამ სლოვაკეთი მხარს არ დაუჭერს შემოვლით გზებს ან რაიმე სახის ფავორიტიზმს სხვების ხარჯზე“, - განმარტა სლოვაკეთის პრეზიდენტმა.

„ვერ წარმომიდგენია ევროკავშირის გაფართოება იმ ქვეყნის ხარჯზე, რომელიც ამჟამად რუსეთთან ომშია და რომელზეც რუსეთმა თავდასხმა განახორციელა, რადგან ეს, იმავდროულად, ნიშნავს ომის გადმოტანას ევროკავშირის ფარგლებს გარედან მისი საზღვრების შიგნით“, - თქვა მან.