სომხეთის საპარლამენტო არჩევნებში ნიკოლ ფაშინიანის პარტიამ გაიმარჯვა - ცესკო ყველა ბიულეტენის დამუშავების შედეგებს აქვეყნებს

სომხეთის პრემიერ-მინისტრის, ნიკოლ ფაშინიანის პარტიამ „სამოქალაქო კონტრაქტი“ 7 ივნისს გამართულ საპარლამენტო არჩევნებში გაიმარჯვა. როგორც 8 ივნისს დილით ქვეყნის ცენტრალურმა საარჩევნო კომისიამ ყველა ბიულეტენის დამუშავების შედეგად განაცხადა, „სამოქალაქო კონტრაქტმა“ ხმების 49,81% მიიღო.

ოპოზიციურმა ალიანსმა „ძლიერი სომხეთი“, რომელსაც სომხური წარმოშობის ბიზნესმენი სამველ კარაპეტიანი ხელმძღვანელობს, ხმების 23,29% მოიპოვა. ოპოზიციური ძალების მეორე ბლოკი -„სომხეთი“, რომლის სათავეშიც ქვეყნის ყოფილი პრეზიდენტი რობერტ ქოჩარიანი დგას - 9,94%-ს იღებს.

მეოთხე ადგილზეა ბიზნესმენ გაგიკ ცარუკიანის ოპოზიციური პარტია „აყვავებული სომხეთი“, რომელმაც ხმების ზუსტად 4% დააგროვა. ყოფილი ომბუდსმენის, არმან თათოიანის პარტიამ „ერთობის ფრთები“ კი ამომრჩეველთა 2,3%-ის მხარდაჭერა მოიპოვა.

შედეგად, „სამოქალაქო კონტრაქტი“ 61 მანდატს მიიღებს, ბლოკი „ძლიერი სომხეთი“ - 28 მანდატს, ბლოკი „სომხეთი“ - 11 მანდატს, ხოლო „ერთობის ფრთები“ - 5 მანდატს.

საბოლოო აქტივობამ 58,97% შეადგინა, რაც მეტია, ვიდრე 2018 და 2021 წლის არჩევნებზე.