სპორტის მინისტრი: ასეთი დიდი საერთაშორისო სპორტული ფორუმისთვის ერთ-ერთი მნიშვნელოვანი კრიტერიუმია ქვეყანაში მშვიდობა და უსაფრთხოება. რეგიონში ამდენი წლის უწყვეტმა მშვიდობამ მისცა საშუალება ისეთ ავტორიტეტულ ორგანიზაციას, როგორიც არის ძიუდოს საერთაშორისო ფედერაცია საქართველოსთვის მიენიჭებინა 2029 წლის ძიუდოს მსოფლიო ჩემპიონატი

თბილისში ძიუდოს მსოფლიო ჩემპიონატი ჩატარდება. როგორც გადაცემაში „იმედი LIVE“ სპორტის მინისტრმა შალვა გოგოლაძემ განაცხადა, საქართველოში ასეთი მნიშვნელოვანი ღონისძიების ჩატარების გადაწყვეტილება ძიუდოს საერთაშორისო ფედერაციამ, რამდენიმე კრიტერიუმის გათვალისწინებით მიიღო, მათ შორის არის მშვიდობა.

„რა თქმა უნდა ასეთი დიდი საერთაშორისო სპორტული ფორუმისთვის ერთ-ერთი მნიშვნელოვანი კრიტერიუმია ქვეყანაში მშვიდობა და უსაფრთხოება. თითოეული საერთაშორისო ორგანიზაცია ამას განსაკუთრებულ ყურადღებას აქცევს. შესაბამისად, ჩვენთან რეგიონში ამდენი წლის უწყვეტმა მშვიდობამ მისცა საშუალება ისეთ ავტორიტეტულ ორგანიზაციას, როგორიც არის ძიუდოს საერთაშორისო ფედერაცია, საქართველოსთვის მიენიჭებინა საქართველოს სპორტის ისტორიისთვის მართლაც მნიშვნელოვანი - 2029 წლის ძიუდოს მსოფლიო ჩემპიონატი“, - განაცხადა შალვა გოგოლაძემ.

მისი თქმით, კიდევ ერთი მიზეზი, რის გამოც არჩევანი შეჩერდა საქართველოზე ეს არის ის ფაქტორი, რომ ჩვენს ქვეყანას ჰყავს მოქმედი ევროპის და მსოფლიო ჩემპიონები, ძიუდოისტები და ამ სპორტში მოღვაწეობის დიდი ტრადიაცია აქვს.

შალვა გოგოლაძის განცხადებით, თავად ძიუდოს ფედერაცია ბოლო წლებში განსაკუთრებულად კარგად მოღვაწეობს, როგორც ქვეყნის შიგნით, ასევე ქვეყნის გარეთ. მაღალი ხარისხით ტარდება გრანპრი, გრან სლემი.

„ჩვენი მთავარი პრიორიტეტია საერთაშორისო ფედერაციებთან უფრო მჭიდრო კავშირი და ამ მჭიდრო კავშირით შემდეგ ჩვენი ქვეყნისთვის შესაძლებლობის მიცემა იმისა, რომ ასეთ დიდ ტურნირებს უმასპინძლოს“, - განაცხადა შალვა გოგოლაძემ.

მისი თქმით, საქართველო რეგიონში დიდი სპორტული ჰაბია.