სპორტის მინისტრი მაგიდის ჩოგბურთში ევროპის ახალგაზრდულ ჩემპიონატზე ქართველი სპორტსმენების ასპარეზობებს დაესწრო
საქართველოს სპორტის მინისტრი შალვა გოგოლაძე პორტუგალიაში ოფიციალური ვიზიტით იმყოფება. მინისტრი ვიზიტისას ქალაქ გონდომარში მიმდინარე მაგიდის ჩოგბურთის ევროპის ახალგაზრდულ ჩემპიონატზე ქართველი სპორტსმენების ასპარეზობას პორტუგალიის რესპუბლიკაში საგანგებო და სრულუფლებიან ელჩ ლევან წურწუმიასთან ერთად დაესწრო.
კონტინენტის პირველობაზე საქართველოს ნაკრების ღირსებას ექვსი სპორტსმენი იცავს. მინისტრი სპორტსმენებსა და მწვრთნელებს შეხვდა და მათ ევროპის ჩემპიონატზე წარმატებული ასპარეზობა უსურვა.
ევროპის ჩემპიონატს ესწრებოდნენ საქართველოს მაგიდის ჩოგბურთის ეროვნული ფედერაციის პრეზიდენტი გურამ გოგოლაძე და ფედერაციის წარმომადგენლები.
მიმდინარე ევროპის ჩემპიონატზე ორი ქართველი არბიტრი - თეონა თვაური და ილია სიმონიანი - მსაჯობს.
2029 წელს მაგიდის ჩოგბურთში ევროპის ახალგაზრდულ ჩემპიონატს ისტორიაში პირველად საქართველო უმასპინძლებს. გადაწყვეტილება პორტუგალიაში, ქალაქ პორტოში, ევროპის მაგიდის ჩოგბურთის გაერთიანების მმართველობითი საბჭოს სხდომაზე გამოცხადდა.
იმედი
წყარო: imedinews.ge