სტარმერმა რუსული გემის მიერ ლა-მანშის სრუტეში განხორციელებულ გასროლას უპასუხისმგებლო ნაბიჯი უწოდა

დიდი ბრიტანეთის პრემიერ-მინისტრის კირ სტარმერის განცხადებით, ლა-მანშის სრუტეში რუსული სამხედრო გემის მიერ განხორციელებული გამაფრთხილებელი გასროლა უპასუხისმგებლო ნაბიჯი იყო.

როგორც მან BBC-თან ინტერვიუში აღნიშნა, ინციდენტი, რომელიც ბრიტანეთის ტერიტორიულ წყლებთან ახლოს მოხდა, შეშფოთებას იწვევს.

„ის, რაც ლა-მანშში მოხდა, ღრმა შეშფოთებას იწვევს. ეს უპასუხისმგებლობაა“, - განაცხადა სტარმერმა.

მან აგრეთვე აღნიშნა, რომ ბრიტანეთის თავდაცვის სამინისტროს შეფასებით, რუსულმა გემმა გამაფრთხილებელი გასროლა განახორციელა იმ დროს, როცა ახლოს კერძო იახტა მიცურავდა.

„ეს არ უნდა მომხდარიყო. ეს უპასუხისმგებლობაა, ხოლო იახტაზე მყოფი წყვილი, როგორც ჩანს, შეშინებული იყო“, - დასძინა სტარმერმა.

ცნობისთვის, გუშინ ბრიტანეთის თავდაცვის სამინისტრომ გაავრცელა ინფორმაცია, რომლის თანახმადაც ლა-მანშის სრუტეში ბრიტანეთის დროშის ქვეშ მცურავ იახტასა და რუსულ სამხედრო ხომალდს შორის ინციდენტი მოხდა.