სტატიებისა და ანგარიშების შემდეგ გიორგი კანდელაკი „ფეისბუქ“ პოსტით ცდილობს ამტკიცოს, თითქოს საქართველოში ირანული გავლენებია

სტატიებისა და ანგარიშების შემდეგ გიორგი კანდელაკი ახლა „ფეისბუქ პოსტით“ ცდილობს ამტკიცოს, თითქოს საქართველოში ირანული გავლენებია. კანდელაკი წერს, რომ საქართველოში ფუნქციონირებს ალ მუსტაფას უნივერსიტეტი და თავადვე ამბობს, რომ უნივერსიტეტს აკრედიტაცია არ აქვს. „ფეისბუქ“ პოსტში იკვეთება, რომ კანდელაკი ვარაუდებზე საუბრობს.

„თუ სხვაგან იყენებენ ამ უნივერსიტეტს ირანის სპეცსამსახურები რეკრუტირებისთვის - საქართველოში არ იყენებენ?! ის, რომ ალ მუსტაფას არ აქვს ავტორიზაცია და აკრედიტაცია მართალია, თუმცა მერე რა?! ის ხომ არსებობს და ფუნქციონირებს", - წერს კანდელაკი.

როგორც ცნობილია, გიორგი კანდელაკის „კვლევაზე“ დაყრდნობით, რამდენიმე დღის წინ ამერიკული გამოცემა საქართველოს ტერორისტული ოპერაციების ცენტრად მოიხსენიებდა და წერდა, რომ თბილისი ირანელთა რეკრუტირების და ტერორისტული ოპერაციების ნაყოფიერ ნიადაგად იქცა, თუმცა, კანდელაკს ანტიქართული ბრალდების გასამყარებლად არც მაშინ მოუყვანია არც ერთი ფაქტი.