თამარ იოსელიანი: 2030 წლისთვის ტვირთბრუნვის გაორმაგებას ველოდებით - ამ მიმართულებით სახელმწიფოს აქვს ძირითადი ინფრასტრუქტურის განვითარების მოკლე, საშუალო და გრძელვადიანი გეგმა
ანაკლიის საზღვაო ნავსადგური, მასთან დამაკავშირებელი გზა და რკინიგზა, ასევე გაძლიერებული "საქართველოს რკინიგზა" - როგორც სავაგონო და სალოკომოტივო პარკით, ისე გაციფრულების და შესაბამისი სისტემებით, უზრუნველყოფს იმას, რომ ჩვენ რეგიონში ვიქნებით ძლიერი, სანდო, ეფექტური და სტაბილური პარტნიორი, - განაცხადა ეკონომიკისა და მდგრადი განვითარების მინისტრის მოადგილე თამარ იოსელიანმა. მან შუა დერეფნის მარშრუტის განვითარების პროცესში ანაკლიის ღრმაწყლოვანი ნავსადგურის მნიშვნელობაზე ისაუბრა.
როგორც მინისტრის მოადგილემ აღნიშნა, დღეს საქართველოს საზღვაო ინფრასტრუქტურას არ შეუძლია დიდი ზომის გემების მიღება, შესაბამისად, ამ მიმართულებით საქართველო კონკურენციას ვერ უწევს რეგიონში არსებულ სხვა ნავსადგურებს.
„ჩვენ ვახორციელებთ უმსხვილეს ინვესტიციებს საგზაო, სარკინიგზო და საზღვაო ინფრასტრუქტურაში, რათა მზად დავხვდეთ გაზრდილ ტვირთნაკადებს. 2030 წლისთვის ველოდებით ტვირთბრუნვის გაორმაგებას და ამ მიმართულებით სახელმწიფოს აქვს როგორც მოკლევადიანი, ასევე საშუალოვადიანი და გრძელვადიანი გეგმა, თუ როგორ უნდა განვითარდეს ძირითადი კრიტიკული ინფრასტრუქტურა“, - აღნიშნა თამარ იოსელიანმა.
მინისტრის მოადგილე ხაზს უსვამს - საქართველოს ეს სამივე კომპონენტი - საგზაო, სარკინიგზო და საზღვაო ინფრასტრუქტურა სინერგიულად ვითარდება, რათა შუა დერეფნისთვის საქართველო იყოს სანდო, სტაბილური და ეფექტური, ასევე სწრაფი კვანძი ევროპა - აზიის დაკავშირებადობისთვის.
იმედი
წყარო: imedinews.ge