თამარ მახარაშვილი: ჩვენ შევცვალეთ სახელმძღვანელოების მეთოდოლოგია. ბავშვი პასიური მსმენელი კი არ უნდა იყოს, არამედ შემოქმედი და ჩართული უნდა იყოს სასწავლო პროცესში

ზოგადი განათლების ეროვნულმა მიზნებმა მოგვცა ჩვენ ასეთი დაკვეთა, რომ სკოლამ უნდა გაზარდოს საკუთარი ქვეყნის ისტორიის, ტრადიციისა და კულტურის მცოდნე მოქალაქე, შესაბამისი საგანი უნდა ასწავლოს ხარისხიანად, - განაცხადა გადაცემაში „ღია ეთერი“ საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილმა.

მისივე თქმით, სკოლის ყველაზე მთავარი დაკვეთაა სკოლიდან პასუხისმგებლობით სავსე მოქალაქის გამოშვება, რომელმაც, პირველ რიგში, იცის, ვინ არის, საიდან მოდის, როგორი ქვეყნის შვილია, იცის საკუთარი ქვეყნის ისტორიაც და ტრადიციაც და ამის შემდეგ შეუძლია, რომ გაიგოს სხვისიც, დააფასოს, შეაფასოს და აღიაროს.

„ამ ძირითად პრინციპებს ეფუძნება ჩვენი ზოგადი განათლების ეროვნული მიზნები. ამ დიდი რეფორმის გზაზე ყველაზე მთავარი, რაც ჩვენ დავიწყეთ, ეს იყო სახელმძღვანელოების შექმნა და ამ სახელმძღვანელოებში იმ არსის გადმოცემა, რომ სკოლა მხოლოდ საგანმანათლებლო დაწესებულება არ არის, ის არის სააღმზრდელოც.

ჩვენს ახალ ქართული ენის სახელმძღვანელოებში არცერთი ნაწარმოები არ არის ისე გადმოცემული, რომ არ იყოს ბმა მსოფლიო ლიტერატურასთან. ჩვენ ყოველთვის თანამედროვენი ვიყავით და მარადიული ღირებულებები ყოველთვის მოჰყვებოდა ჩვენს ლიტერატურას.

ჩვენ შევცვალეთ სახელმძღვანელოების მეთოდოლოგია. ბავშვი პასიური მსმენელი კი არ უნდა იყოს, არამედ შემოქმედი და ჩართული უნდა იყოს სასწავლო პროცესში“, - აღნიშნა თამარ მახარაშვილმა.