თამთა ქიმბარიშვილი სიძულვილის ენასთან ბრძოლის სამმართველოს მუშაობაზე: როდესაც ჩვენ გამოვაქვეყნებთ ისეთ მასალას, რომელიც შეიცავს სავარაუდო სამართალდარღვევის ნიშნებს, დაიწყება ადმინისტრაციული წარმოება - მასალები შეიკვრება სამართალდარღვევის ოქმთან ერთად და საქართველოს კანონმდებლობით გადაეგზავნება საერთო სასამართლოებს

როდესაც ჩვენ გამოვაქვეყნებთ ისეთ მასალას, რომელიც შეიცავს სავარაუდო სამართალდარღვევის ნიშნებს, იმას ნიშნავს, რომ დაიწყება ადმინისტრაციული წარმოება, - განაცხადა გადაცემაში „იმედის კვირა“ შინაგან საქმეთა სამინისტროს ადამიანის უფლებათა დაცვის დეპარტამენტის სიძულვილის ენის წინააღმდეგ ბრძოლის სამმართველოს უფროსმა თამთა ქიმბარიშვილმა.

მისი განმარტებით, ადმინისტრაციული წარმოების ფარგლებში მოხდება სავარაუდო სამართალდამრღვევი პირის ვინაობის დადგენა.

„მოხდება აღნიშნული პიროვნების გამოვლენა. შემდგომში ჩატარდება ადმინისტრაციული წარმოება, რაც გულისხმობს ადმინისტრაციული წარმოების მასალების მომზადებას, ამ პიროვნების იდენტიფიცირებას, ეს მასალები შეიკვრება სამართალდარღვევის ოქმთან ერთად და საქართველოს კანონმდებლობით, განსჯადობის წესების დაცვით გადაეგზავნება საერთო სასამართლოებს”, - განაცხადა თამთა ქიმბარიშვილმა.

როგორც ცნობილია, შინაგან საქმეთა სამინისტროს ადამიანის უფლებების დაცვის დეპარტამენტის სიძულვილის ენის წინააღმდეგ ბრძოლის ახლად შექმნილი სამმართველო ფუნქციონირებას შეუდგა. შსს-ის ცნობით, სამმართველოს ძირითადი ფუნქცია-მოვალეობები ადამიანის ღირსების შემლახველი/შეურაცხმყოფელი და სიძულვილის ენის შემცველი საჯაროდ გავრცელებული იმგვარი განცხადებების მონიტორინგი და პროაქტიული გამოვლენა იქნება, რომელიც შეიცავს საქართველოს ადმინისტრაციულ სამართალდარღვევათა კოდექსით გათვალისწინებულ სამართალდარღვევის ნიშნებს.