თელავში, ერთ-ერთ სასტუმროში მომხდარი ინციდენტის საქმეზე დაკავებული გიორგი ჭიღლაძე 5 000-ლარიანი გირაოს სანაცვლოს გათავისუფლდა

თელავში, ერთ-ერთ სასტუმროში მომხდარ ინციდენტთან დაკავშირებით დაკავებულ გიორგი ჭიღლაძეს აღკვეთის ღონისძიების სახით 5000-ლარიანი გირაო შეეფარდა. გადაწყვეტილება თელავის რაიონული სასამართლოს მოსამართლემ, თამარ კაპანაძემ მიიღო.

გიორგი ჭიღლაძე სხდომათა დარბაზიდან გათავისუფლდა.

ადვოკატის განცხადებით, სასტუმროს ადმინისტრაციამ მზაობა გამოხატა, გირაოს თანხა გადაიხადოს.

„მადლობა ბრალდების მხარესაც, რადგან თავიდანვე მიმართა სასამართლოს აღკვეთის ღონისძიების სახით გირაოს გამოყენებაზე.

მიზეზი იყო პროვოკაციული ქცევა, სხვადასხვა სითხეების გადმოსხმა და შეურაცხმყოფელი კომენტარები. მოთხოვნილია ექსპერტიზა და ჯერჯერობით ჩატარებული არ არის“, - განაცხადა ადვოკატმა ლაშა კაპანაძემ.

„როგორც სხვა მსგავსი კატეგორიის დანაშაულებთან დაკავშირებით ბრალდების მხარე ითხოვდა ბრალდებულის მიმართ აღკვეთის ღონისძიების სახით გირაოს გამოყენებას 5000 ლარის ოდენობით. მოსამართლის მიერ დაკმაყოფილდა ბრალდების მხარის შუამდგომლობა აღკვეთის ღონისძიების გამოყენების ნაწილში და ბრალდებულს შეეფარდა გირაო 5000 ლარის ოდენობით, თუმცა გირაოს უზრუნველსაყოფად გამოყენებული არ იქნა პატიმრობა.

ყველა გამოკითხული პირის მიერ მოწოდებული ინფორმაციით დასტურდება ის ფაქტობრივი გარემოებები, რაზეც ბრალდების მხარემ ისაუბრა სასამართლო პროცესზე და ბრალად აქვს წარდგენილი ბრალდებულს. გამოძიება დაინტერესებულია ყველა მიმართულებით და ყველა მიმართულებით აქტიურად ვაწარმოებთ საგამოძიებო მოქმედებებს, როგორც კი გამოიკვეთება დანაშაულის ნიშნები და გვექნება შესაბამისი მტკიცებულებები, მოხდება დამნაშავეების დასჯა“, - განაცხადა პროკურორმა ბექა ნათელაურმა.