თენგიზ შარმანაშვილი: იმ ნაწილში, რა ნაწილშიც ახლა ხდება ჯარიმების შემცირება, დადგინდა, რომ დაშავებულთა და დაღუპულთა რაოდენობა ასეთი ტიპის სიჩქარით გადაჭარბების დროს, თითქმის არ არის

ბევრ რამეში ლიდერები ვართ, მაგრამ ერთ სამწუხარო საკითხშიც ევროპაში ლიდერები ვართ. ეს არის ერთ სულ მოსახლეზე საგზაო შემთხვევებით დაღუპულთა და დასახიჩრებულთა რაოდენობა, - განაცხადა თავდაცვისა და უშიშროების კომიტეტის თავმჯდომარის მოადგილემ, თენგიზ შარმანაშვილმა.

მან კომენტარი გააკეთა მოძრაობის დადგენილი სიჩქარის გადაჭარბებისთვის განსაზღვრული ჯარიმების შემცირებასთან დაკავშირებით, პარლამენტის მიერ მესამე მოსმენით კანონპროექტში შეტანილ ცვლილებებზე.

„იმ ნაწილში, რა ნაწილშიც ახლა ხდება ჯარიმების შემცირება, დადგინდა, რომ დაშავებულთა და დაღუპულთა რაოდენობა ასეთი ტიპის სიჩქარით გადაჭარბების დროს, თითქმის არ არის. უფრო ხდება გადაჭარბება, სადაც მაღალი სანქცია შენარჩუნებულია. თუ არის ქმედითი ეს პრევენციისთვის, რა თქმა უნდა, შეიძლება დავტოვოთ, ან შესაძლოა, ესა თუ ის საკითხი კიდევ გავართულოთ, მაგრამ თუ ეს დიდ გამოძახილს ვერ პოვებს, ეს მაღალი ტვირთი არ იქნება. ასე, რომ ეს გადაწყვეტილება ანალიზის, სტატისტიკის შედეგია და იქიდან გამომდინარეობს“, - აღნიშნა შარმანაშვილმა.

პარლამენტმა მესამე მოსმენით მხარი დაუჭირა „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ კანონპროექტს, რომელიც მოძრაობის დადგენილი სიჩქარის გადაჭარბებისთვის განსაზღვრული ჯარიმების შემცირებას ითვალისწინებს.