თენგიზ შარმანაშვილი: საქართველო გააგრძელებს პირობების შესრულებას, რაც ასოცირების შეთანხმებით არის გათვალისწინებული, როგორც მაშინ მოთმინებით გავაგრძელეთ სვლა კანდიდატის სტატუსის მისაღებად, ასევე გავაკეთებთ ახლაც

რა არის საქართველოზე დამოკიდებული, რომ ევროკავშირთან ურთიერთობა გაუმჯობესდეს - ამ საკითხზე „დღის ქრონიკაში“ თავდაცვისა და უშიშროების საპარლამენტო კომიტეტის თავმჯდომარის პირველმა მოადგილემ თენგიზ შარმანაშვილმა ისაუბრა.

როგორც მან აღნიშნა, საქართველო გააგრძელებს პირობების შესრულებას, რაც ასოცირების შეთანხმებით არის გათვალისწინებული.

„მიუხედავად იმისა, რომ კანდიდატ ქვეყნებს შორის ყველაზე კარგი მაჩვენებლები საქართველოს ჰქონდა, წელიწად-ნახევრით გვიან მოგვცეს კანდიდატის სტატუსი. მიუხედავად იმისა, რომ ახლაც გვიგვიანებენ ამ ყველაფერს, 2028 წელს და 2030 წლისთვისაც, როდესაც მათ დააანონსეს რეალური გაფართოების საკითხები, ყველაზე კარგი მაჩვენებელი გვექნება.

ჩვენი მთავარი ამოცანაა, კარი არ გავიჯახუნოთ და პროცესს ხელი არ ვკრათ. როგორც მაშინ მოთმინებით გავაგრძელეთ სვლა კანდიდატის სტატუსის მისაღებად, ასევე გავაკეთებთ ახლაც - გავაგრძელებთ პირობების შესრულებას, რაც ასოცირების შეთანხმებით არის გათვალისწინებული და გვექნება საუკეთესო მაჩვენებლები მათ შორის მათზე, ვისაც ჩვენზე ადრე გაუხსნეს დიალოგი“, - აღნიშნა შარმანაშვილმა.