თეთრი სახლი: ეროვნული კონტრტერორისტული საქმიანობის პრიორიტეტულ მიმართულებას წარმოადგენს იმ ძალადობრივი პოლიტიკური ჯგუფების სწრაფი გამოვლენა და ნეიტრალიზება, რომელთა იდეოლოგია არის ანტიამერიკული და რადიკალურად პროტრანსგენდერული
აშშ-ის პრეზიდენტის, დონალდ ტრამპის ადმინისტრაციამ ტერორიზმთან ბრძოლის ახალი ეროვნული სტრატეგია გამოაქვეყნა, რომლის ერთ-ერთ პრიორიტეტულ მიმართულებად ცხადდება იმ ძალადობრივი პოლიტიკური ჯგუფების სწრაფი გამოვლენა და ნეიტრალიზება, რომელთა იდეოლოგია არის ანტიამერიკული, რადიკალურად პროტრანსგენდერული და ანარქისტული.
„კარტელებთან და ისლამისტურ ტერორისტულ დაჯგუფებებთან ბრძოლის გარდა, ჩვენი ეროვნული კონტრტერორისტული საქმიანობის პრიორიტეტულ მიმართულებას წარმოადგენს იმ ძალადობრივი პოლიტიკური ჯგუფების სწრაფი გამოვლენა და ნეიტრალიზება, რომელთა იდეოლოგია არის ანტიამერიკული, რადიკალურად პროტრანსგენდერული და ანარქისტული“, - აღნიშნულია დოკუმენტში.
დასახული მიზნის მისაღწევად აშშ-ის ხელისუფლება გამოიყენებს მის ხელთ არსებულ ყველა საშუალებას, რათა მავნე ორგანიზაციების მოღვაწეობა ქვეყნის შიგნით შეისწავლოს.
„გამოვიყენებთ ჩვენს ხელთ არსებულ ყველა კონსტიტუციურ საშუალებას, რათა ქვეყნის შიგნით მათი საქმიანობა შევისწავლოთ, მოვახდინოთ მათი წევრების იდენტიფიცირება და გამოვიკვლიოთ კავშირი საერთაშორისო ორგანიზაციებთან, ისეთებთან, როგორიცაა „ანტიფა“. სამართალდამცავი ორგანოების წყალობით ოპერატიულად მოვახდენთ მათ ჩახშობას, სანამ ისინი უდანაშაულო ადამიანებს დაასახიჩრებენ ან მოკლავენ“, - წერია დოკუმენტში.
ტრამპის ადმინისტრაციის განცხადებით, ვაშინგტონი იმავეს გააკეთებს ასეთი დაჯგუფებების სახელმწიფო სპონსორებთან მიმართებით, რომლებიც აშშ-ის ტერიტორიაზე და ამერიკელების წინააღმდეგ შეთქმულებებს ამზადებენ.
