The New York Times: ისრაელის გეგმის ფარგლებში, რომელიც მაჰმუდ აჰმადინეჟადის ირანის ლიდერად დასმას ითვალისწინებდა, ყოფილი პრეზიდენტი მოსადის ხელმძღვანელს შეხვდა - ამჟამად აჰმადინეჟადი დაკავებულია

გამოცემა The New York Times-ის ინფორმაციით, ისრაელი მრავალი წლის განმავლობაში ცდილობდა, ირანის ლიდერად ქვეყნის ყოფილი პრეზიდენტი მაჰმუდ აჰმადინეჟადი დაებრუნებინა.

კამპანია, რომლის ფარგლებშიც, სხვა ღონისძიებებთან ერთად, „მოსადის“ ხელმძღვანელი, დავიდ ბარნეა უნგრეთში გამართულ აკადემიურ კონფერენციაზე აჰმადინეჟადთან შეხვედრასაც მართავდა, თებერვალში, ირანზე აშშ-ისა და ისრაელის თავდასხმის პირველ დღეს კულმინაციას მიაღწია: აჰმადინეჟადის პირადი დაცვის წევრებზე თავდასხმით ის შინაპატიმრობიდან გაათავისუფლეს.

The New York Times-ის ცნობით, თავდასხმის შემდეგ ავტომობილით ყოფილი პრეზიდენტი უსაფრთხო ადგილზე გადაიყვანეს, თუმცა მოგვიანებით მან ეს თავშესაფარი დატოვა, რადგან იმედგაცრუებული დარჩა ისრაელის გეგმით, რომელიც მისი ხელისუფლების სათავეში დაბრუნებას ისახავდა მიზნად.

აჰმადინეჟადის ამჟამინდელი სტატუსი გაურკვეველია. იგი მცირე ხნით შენიშნეს დაცვის წევრებით გარშემორტყმული ირანის მოკლული უზენაესი ლიდერის, ალი ხამენეის დაკრძალვაზე. ვარაუდობენ, რომ ისრაელის დაზვერვასთან კავშირის გამო, ამჟამად ირანის ისლამური რევოლუციის გუშაგთა კორპუსის პატიმრობაში იმყოფება.

The New York Times-ის ინფორმაციით, უნგრეთმა აჰმადინეჟადი ბუდაპეშტში, 2024 წელს კლიმატის ცვლილების შესახებ დაგეგმილ კონფერენციაზე სწორედ იმ მიზნით მიიწვია, რომ მას დავიდ ბარნეასთან შეხვედრის შესაძლებლობა ჰქონოდა. უნგრეთის მაღალი რანგის ოფიციალურმა პირმა ლუდოვიკას საჯარო სამსახურის უნივერსიტეტის რექტორს, გერგელი დელის აჰმადინეჟადის მოწვევა სთხოვა.

პოსტის დატოვების შემდეგ, ხელისუფლებამ აჰმადინეჟადს არაერთხელ აუკრძალა შემდგომ არჩევნებში მონაწილეობა.

ბოლო წლებში ის ხამენეის რეჟიმის კრიტიკოსად იქცა და მაღალი რანგის ოფიციალური პირები კორუფციასა და მმართველობის სისუსტეში დაადანაშაულა.