The Spectator: უკრაინა ომს აგებს

ვლადიმერ პუტინს 2022 წლის შემდეგ ომის მიზნები არ შეუცვლია, დონალდ ტრამპს კი, სამშვიდობო გეგმის სახით, მხოლოდ ომის რუსეთის პირობებით დასრულება აინტერესებს. ეს არის ჯარედ კუშნერისა და სტივ უიტკოფის მოსკოვსა და კიევში დიპლომატიის მთავარი შედეგი, - წერს ბრიტანული გამოცემა The Spectator.

სტატიაში სახელწოდებით „უკრაინა ომს აგებს“, აღნიშნულია, რომ ტაქტიკურ დონეზე უკრაინის მდგომარეობა მნიშვნელოვნად დამძიმდა, რადგან რუსეთის იერიშები უფრო დამანგრეველი გახდა. უკრაინის პრეზიდენტ ვოლოდიმირ ზელენსკის მრჩევლის, სერგი ბესკრესტნოვის განცხადებით, თავდასხმა თავდაცვაზე ძლიერი გახდა და ქვეყანას ქალაქების სრულად დასაცავად საკმარისი რაკეტები არ ექნება. პარალელურად, დასავლურმა სანქციებმა რუსეთის სამხედრო-სამრეწველო კომპლექსი ვერ შეაჩერა, რადგან ევროპა რუსული ენერგორესურსების შესყიდვას კვლავ განაგრძობს.

„ერთი მხრივ, ტრამპი ღრმად ცდება, როდესაც სჯერა, რომ ბიზნესგარიგებების შეთავაზებას კრემლის გადაწყვეტილებებზე რაიმე გავლენა ექნება. პუტინს რუსეთის ეკონომიკა რომ ადარდებდეს, სრულმასშტაბიან შეჭრას საერთოდ არ დაიწყებდა. პუტინისთვის ეს კონფლიქტი კეთილდღეობის შენარჩუნებას კი არა, რუსეთის ეგზისტენციალური საფრთხისგან დაცვას ეხება. ამავდროულად, ზელენსკიც არანაკლებ ილუზიაშია რუსეთზე უკრაინის გამარჯვების შანსებთან დაკავშირებით“, - წერს ავტორი.

მისივე მოსაზრებით, ევროპელი მოკავშირეების სტრატეგიულმა შეცდომებმა - უკრაინისთვის საჭირო შეიარაღების შეზღუდვამ და რეალური სამშვიდობო პროცესის ჩაშლამ კიევი უმძიმეს ვითარებაში ჩააყენა. პრემიერ-მინისტრ სერგეი კორეცკის განცხადებით, უკრაინას 2026 წლის თავდაცვის ბიუჯეტი თითქმის ამოეწურა და 26 მილიარდი ევროს ოდენობის დეფიციტი აქვს. ფრონტზე ჯარისკაცების და ცაზე „პატრიოტის“ სისტემების ნაკლებობასთან ერთად, ქვეყანას ომის გაგრძელებისთვის ფინანსებიც ეწურება.

The Spectator-ი წერს, რომ ვითარებას შიდაპოლიტიკური კრიზისიც ამძიმებს. კორუფციულმა სკანდალებმა, უწყებებს შორის დაპირისპირებამ და სამხედრო შესყიდვებში გამოვლენილმა მილიარდიანმა თაღლითობამ ზელენსკის ადმინისტრაციის მიმართ ნდობა მკვეთრად შეამცირა. SOCIS-ის კვლევებით, უკრაინელების უმრავლესობა კორუფციას რუსეთზე დიდ საფრთხედ მიიჩნევს.

სტატიაში ასევე აღნიშნულია, რომ ევროპაში პუტინთან დიალოგზე არსებული ტაბუ ირღვევა. საქსონიის არჩევნებში გამარჯვებული გერმანული პარტია AfD-ის ლიდერი ელის ვაიდელი აცხადებს, რომ რუსეთთან მშვიდობის მისაღწევად ღია არხის შენარჩუნებაა საჭირო. ზელენსკის ყოფილი პრესმდივანი იულია მენდელიც აღნიშნავს, რომ იზრდება ახალი პოლიტიკური ძალები, რომლებიც მშვიდობიანი ევროპის ერთადერთი შანსია, რადგან იარაღი უკრაინას ვერ გადაარჩენს.

„დღემდე შეთავაზებული თითოეული სამშვიდობო პირობა კიევისთვის წინაზე უარესი იყო. როგორც ჩანს, პუტინის მიზანია უკრაინის ქალაქებზე საბოლოო, სასტიკი დარტყმის მიყენება და ომის საკუთარი პირობებით დასრულება. ტრამპის ადმინისტრაციამ დიდი ხანია უარი თქვა უკრაინის სრული გამარჯვების მხარდაჭერაზე. ევროპა კი მხოლოდ განცხადებებით შემოიფარგლება - მას არ გააჩნია კონკრეტული გეგმა უკრაინის დასაცავად, რუსეთის ეკონომიკის გასანადგურებლად ან პუტინის ნების გასატეხად“, - აღნიშნულია სტატიაში.