The Telegraph: აშშ-მა ჩინეთის ზეწოლის გამო ტაივანისთვის 14 მილიარდი დოლარის ღირებულების შეიარაღების მიყიდვა შეაჩერა

აშშ-ის მთავრობამ ტაივანისთვის 14 მილიარდი დოლარის ღირებულების სამხედრო შეიარაღების მიყიდვა შეაჩერა, რაც ჩინეთის მხრიდან ზეწოლაზე მიუთითებს. ინფორმაციას The Telegraph-ი ავრცელებს.

მოსალოდნელი იყო, რომ აშშ ტაივანს კუნძულის დაცვისთვის სასიცოცხლოდ მნიშვნელოვან შეიარაღებას მიაწვდიდა, მაგრამ აშშ-ის პრეზიდენტის დონალდ ტრამპის ჩინეთში ვიზიტის შემდეგ გარიგება დაპაუზდა.

აშშ-ის ხელისუფლების წარმომადგენლებმა განაცხადეს, რომ ისინი გარიგებას დროებით აჩერებენ, რათა შეინარჩუნონ მარაგები, რომლებიც ირანთან შესაძლო ომში დასჭირდებათ.

„ჩვენ ვიღებთ პაუზას, რათა დავრწმუნდეთ, რომ გვაქვს ყველა საჭირო საბრძოლო მასალა ოპერაცია „ეპიკური რისხვის“ გასაგრძელებლად. უბრალოდ, გვსურს დავრწმუნდეთ, რომ ყველაფერი, რაც გვჭირდება, გვაქვს, ხოლო როცა ადმინისტრაცია საჭიროდ ჩათვლის, საერთაშორისო სამხედრო გაყიდვები გაგრძელდება“, - განაცხადა აშშ-ის სამხედრო-საზღვაო ძალების მდივნის მოვალეობის შემსრულებელმა ჰუნგ ცაომ.

როგორც გამოცემა იუწყება, აღნიშნულ ამბავს ტაივანზე სკეპტიკურად შეხვდნენ, რადგან კუნძული საქმის კურსში არავის ჩაუყენებია.

ტაივანის პრეზიდენტის ადმინისტრაციის წარმომადგენლის კუო ია-ჰუს განცხადებით, მათ ცნობად მიიღეს ამერიკული მხარის განცხადება, თუმცა ოფიციალურად მათთვის არავის არაფერი უთქვამს.