The Wall Street Journal: ირანის სამხედროები აცხადებენ, რომ ჰორმუზის სრუტეზე კონტროლი უფრო მომგებიანი იქნება, ვიდრე ნავთობის ექსპორტი

ირანი ჰორმუზის სრუტეზე კონტროლსა და ახლახან დაწესებულ მოსაკრებლებიდან მიღებულ შემოსავლებს იყენებს იმ დეფიციტის შესავსებად, რომელიც აშშ-ის ბლოკადამ გამოიწვია, რამაც ქვეყნის ნავთობის ექსპორტის შესაძლებლობა თითქმის სრულად გაანადგურა, - წერს ამერიკული გამოცემა The Wall Street Journal-ი.

ირანის სამხედრო უწყების განცხადებით, ნებისმიერი ქვეყანა, რომელსაც ამ სტრატეგიული მარშრუტის გადაკვეთა სურს, ეს მათი „ზედამხედველობის“ ქვეშ უნდა განახორციელოს, თუმცა არ დაუკონკრეტებიათ, თუ რას გულისხმობს ეს პროცესი.

ბოლო კვირების განმავლობაში, ირანი დაჟინებით მოითხოვს, რომ სრუტეში გამავალმა გემებმა ნებართვა აიღონ. ბროკერების ინფორმაციით, ქვეყანა თითოეულ ხომალდზე 2 მილიონ დოლარამდე მოსაკრებელს აწესებს.

„ეს კოორდინირებული და სინერგიული კონტროლი, რეგიონზე ირანის მონიტორინგისა და სუვერენიტეტის გაძლიერებასთან ერთად, ქვეყნისთვის ნავთობის რეალიზაციიდან მიღებულ შემოსავალზე ორჯერ მეტ თანხას წარმოშობს“, - განაცხადა ირანის სამხედრო სპიკერმა, ბრიგადის გენერალმა მოჰამედ აკრამინიამ.

ზოგიერთი ანალიტიკოსის შეფასებით, გასულ წელს ირანის მიერ ნედლი ნავთობის გაყიდვებმა მთლიანობაში დაახლოებით 30 მილიარდი დოლარი შეადგინა. მათივე თქმით, ამ თანხიდან ირანი მოგების სახით დაახლოებით ორ მესამედს იტოვებს.

აკრამინიას თქმით, ირანის სამხედრო უწყების მიერ ნაოსნობაზე ზედამხედველობა უზრუნველყოფს „გავლას ყოველგვარი ზიანის გარეშე“.