The Wall Street Journal: პენტაგონმა ევროპაში დამატებითი ჯარების გადასროლა მოულოდნელად შეაჩერა

აშშ-მა ევროპაში დამატებითი ჯარების განლაგების პროცესი ყველასთვის მოულოდნელად შეაჩერა, რაც კონტინენტზე ამერიკელი სამხედროების რაოდენობის შემცირების გზაზე გადადგმული კიდევ ერთი ნაბიჯია. ინფორმაციას The Wall Street Journal-ი ავრცელებს.

გამოცემის ცნობით, საუბარია იმაზე, რომ აშშ პოლონეთში დამატებით ჯავშანსატანკო ბრიგადას აღარ განალაგებს.

აშშ-ის თავდაცვის დეპარტამენტის წარმომადგენლის განცხადებით, ამერიკელებმა აღნიშნული გადაწყვეტილების შესახებ 13 მაისს აშშ-ის ევროპული სარდლობისა და აფრიკასა და ევროპაში არმიის შტაბის შეხვედრაზე გამოაცხადეს.

„ამერიკის ოფიციალურმა პირებმა განაცხადეს, რომ პირველი საკავალერიო დივიზიის ჯავშანსატანკო ბრიგადის 4 ათასზე მეტი სამხედროს განლაგებაზე უარის თქმა არის ევროპაში ამერიკელი სამხედროების ყოფნის ფართო რეკონფიგურაციის ნაწილი. ამასთან ერთად, როგორც ჩანს, სხვა გადაწყვეტილებებიც იქნება მიღებული“, - წერს გამოცემა.

როგორც The Wall Street Journal-ი წერს, მიუხედავად იმისა, რომ ბრიგადა პოლონეთში მიემგზავრებოდა, მის ცალკეულ ქვედანაყოფებს ევროპის სხვა ქვეყნებშიც შეეძლოთ განლაგება. ოფიციალური პირების განცხადებით, აშშ-ის არმიაში უკვე მიმდინარე ოპერაციის გაუქმებით გაკვირვებულები დარჩნენ.

ნატოს ერთ-ერთმა სამხედრო მაღალჩინოსანმა განაცხადა, რომ ალიანსი აღმოსავლეთ ფლანგზე სერიოზულ სამხედრო წარმომადგენლობას მაინც შეინარჩუნებს.

The Wall Street Journal-ი აღნიშნავს, რომ ევროპაში ამერიკული კონტინგენტის შემცირებით ამერიკელი ჯარისკაცების რაოდენობა 2022 წლამდე არსებულ მდგომარეობას დაუბრუნდება.