The Wall Street Journal: რუსეთი ბელარუსზე ზეწოლას ახდენს, რათა უკრაინის წინააღმდეგ ახალი ფრონტი გახსნას
რუსეთი ცდილობს ბელარუსთან სამხედრო თანამშრომლობა კიდევ უფრო გააღრმაოს და ქვეყანა უკრაინაში მიმდინარე ომში ახალი ფრონტის გასახსნელად გამოიყენოს. ინფორმაციას The Wall Street Journal-ი ავრცელებს.
გამოცემის ცნობით, ამ ფონზე, კიევი ბელარუსის ტერიტორიაზე შესაძლო დარტყმების შესახებაც საუბრობს.
ყოფილი და მოქმედი რუსი და ევროპელი ოფიციალური პირების განცხადებით, მიმდინარე წლის დასაწყისში მოსკოვმა ბელარუსზე ზეწოლის კამპანია დაიწყო. მათი თქმით, კრემლი ცდილობს, ქვეყანა უკრაინაში სამხედრო ოპერაციების გაფართოებისთვის ან ჩრდილოატლანტიკური ალიანსის წევრების წინააღმდეგ არატრადიციული ოპერაციების განხორციელებისთვის პლაცდარმად გამოიყენოს.
როგორც The Wall Street Journal-ი იუწყება, აღნიშნული ნაბიჯი იმაზე მიუთითებს, რომ მოსკოვი ომის ესკალაციის შესაძლებლობას განიხილავს, მაშინ, როდესაც რუსეთის არმიას აღმოსავლეთ უკრაინაში წინსვლა უჭირს, ხოლო ვლადიმერ პუტინის მხარდაჭერა კონფლიქტის დაწყებიდან ოთხ წელზე მეტი ხნის შემდეგ სუსტდება.
ოფიციალური პირების თქმით, ამ გეგმაში მნიშვნელოვანი როლი შესაძლოა ბელარუსს დაეკისროს, სადაც რუსეთს ტაქტიკური ბირთვული იარაღი აქვს განთავსებული.
ბელარუსის პრეზიდენტის ალექსანდრე ლუკაშენკოს განცხადებით, გასულ თვეში დაახლოებით 90-წუთიანი სატელეფონო საუბრის დროს საფრანგეთის პრეზიდენტმა ემანუელ მაკრონმა უთხრა, რომ პარიზს ჰქონდა ინფორმაცია ომში ბელარუსის შესაძლო მონაწილეობის შესახებ. ლუკაშენკოს თქმით, მაკრონმა მას ამისგან თავის შეკავებისკენ მოუწოდა.
მაკრონის თანაშემწემ სატელეფონო საუბრის ფაქტი დაადასტურა და აღნიშნა, რომ საფრანგეთის პრეზიდენტმა „ხაზი გაუსვა იმ რისკებს, რომლებიც ბელარუსს ემუქრება, თუ ის თავს რუსეთის მიერ უკრაინის წინააღმდეგ წარმოებულ აგრესიულ ომში ჩათრევის საშუალებას მისცემს“.
მას შემდეგ, რაც რუსეთმა 2022 წელს უკრაინაში თავდაპირველი შეჭრისას ბელარუსის ტერიტორია გამოიყენა, მინსკი კონფლიქტში პირდაპირი ჩართულობისგან ძირითადად თავს იკავებდა, აღნიშნულია სტატიაში.
