თორაძის საერთაშორისო მუსიკალური ფესტივალის მესამე საფესტივალო დღე დავით ხრიკულის კონცერტს დაეთმო
უწყვეტი აპლოდისმენტებითა და ბისზე არაერთგზის გამოძახებით დაჯილდოებული ქართველი პიანისტი - თორაძის საერთაშორისო მუსიკალური ფესტივალის მესამე საფესტივალო დღე დავით ხრიკულის კონცერტს დაეთმო. თბილისის სახელმწიფო კონსერვატორიის დიდ დარბაზში გამართული კლასიკური მუსიკის საღამო, სრული ანშლაგით შედგა.
ახალგაზრდა ქართველი პიანისტი დავით ხრიკული მსმენელის წინაშე გია ყანჩელის სახელობის თბილისის ახალგაზრდულ ორკესტრთან ერთად წარდგა - მირიან ხუხუნაიშვილის დირიჟორობით. პროგრამაში წარმოდგენილი იყო ფრედერიკ შოპენისა და ალექსი მაჭავარიანის ნაწარმოებები.
დავით ხრიკული არაერთი საერთაშორისო ჯილდოს მფლობელია. ის არის პირველი ქართველი პიანისტი, რომელიც ფრედერიკ შოპენის საერთაშორისო საფორტეპიანო კონკურსის ფინალისტი გახდა.
თორაძის საერთაშორისო მუსიკალური ფესტივალი 18 ივნისის ჩათვლით უმასპინძლებს მსმენელს კლასიკური, ფოლკლორული და ბაროკოს მუსიკის კონცერტებზე, ახალგაზრდა და საერთაშორისო შემსრულებლების მონაწილეობით.
იმედი
წყარო: imedinews.ge