თორნიკე ჭეიშვილი „ნაციონალური მოძრაობის“ აქტივისტის პოსტებზე: ეს შეფასებები მორალურ ფსკერს მიღმა განზომილებიდანაა გაკეთებული, ვინაიდან ამით უმძიმესი ტკივილი მიაყენეს იმ ოჯახებს, ბავშვებს, რომელთაც შესაბამისი სინდრომი აქვთ

ამით უმძიმესი ტკივილი მიაყენეს იმ ოჯახებს, ბავშვებს, რომელთაც შესაბამისი სინდრომი აქვთ, - ასე გამოეხმაურა იურიდიულ საკითხთა საპარლამენტო კომიტეტის თავმჯდომარის პირველი მოადგილე თორნიკე ჭეიშვილი „ნაციონალური მოძრაობის“ აქტივისტის ზიზღის კამპანიას აქონდროპლაზიის მქონე ბავშვების წინააღმდეგ.

მისივე თქმით, ასეთი ტიპის შეფასებები ამორალურია.

„გვახსენდება ერთი ანდაზა - როგორც ძაღლის კუდი არ გასწორდება, ისე „ნაცი“ ვერ შეიცვლის ბოროტ ზნეს. ასეთი ტიპის შეფასება არის განცხადება, რომელიც მორალურ ფსკერს მიღმა განზომილებიდანაა გაკეთებული, ვინაიდან ამით უმძიმესი ტკივილი მიაყენეს იმ ოჯახებს, ბავშვებს, რომელთაც შესაბამისი სინდრომი აქვთ. ამიტომ საზოგადოების მხრიდან ნაცმოძრაობას, ამ მომწამვლელ იდეოლოგიას ადამიანებისადმი, რომელიც თავიდან ბოლომდე დეჰუმანიზაციის პოლიტიკაზე არის აგებული, დიდი ხანია თავისი ადგილი მიეჩინა“, - აღნიშნა ჭეიშვილმა.

„ნაციონალური მოძრაობის“ აქტივისტი, აქონდროპლაზიის მქონე ბავშვების დისკრიმინაციას განაგრძობს. შეურაცხმყოფელი პოსტები დარინა მიქელაძემ სოციალურ ქსელში გამოაქვეყნა, მას შემდეგ, რაც მის პირველ პოსტს მშობლების მწვავე რეაქცია მოყვა, მან დაცინვის კამპანია განაგრძო.