ტრამპი არ გამორიცხავს, რომ აშშ რუსეთის ნავთობს სანქციებს კვლავ დაუწესებს

აშშ-ის პრეზიდენტის დონალდ ტრამპის განცხადებით, ამერიკამ რუსეთის ნავთობზე ადრე მოხსნილი სანქციები, შესაძლოა, კვლავ შემოიღოს.

როგორც თეთრი სახლის ლიდერმა აღნიშნა, ირანთან გაფორმებული ურთიერთგაგების მემორანდუმის წყალობით, ჰორმუზის სრუტის გახსნა შესაძლებელი გახდა, რამაც ნავთობის მიწოდება აღადგინა და ფასის ვარდნა გამოიწვია.

„მალე ჩვენ ამის გაკეთებას [რუსულ ნავთობზე სანქციების დაწესებას] შევძლებთ, იმიტომ რომ ნავთობის მიწოდება აღდგა. ჩვენ სანქციები მოვხსენით იმიტომ, რომ ნავთობის მიწოდება არ შეგვეჩერებინა. შესაბამისად, ამის გაკეთება უახლოეს დროში შევძლებთ“, - განაცხადა ტრამპმა.

ცნობისთვის, მას შემდეგ, რაც აშშ და ისრაელი ირანს თავს დაესხნენ, თეირანმა ჰორმუზის სრუტე ჩაკეტა, რამაც ნავთობზე ფასის მკვეთრი ზრდა გამოიწვია. ფასების შესაკავებლად აშშ-მა რუსულ ნავთობზე დაწესებული სანქციები დროებით შეამსუბუქა.