ტრამპი აცხადებს, რომ სიამოვნებით იხილავდა გაერთიანებულ ირლანდიას

აშშ-ის პრეზიდენტმა დონალდ ტრამპმა ირლანდიის პრემიერ-მინისტრ მიხოლ მარტინთან შეხვედრის დროს განაცხადა, რომ სიამოვნებით იხილავდა ირლანდიისა და ჩრდილოეთ ირლანდიის გაერთიანებას.

მისი თქმით, არ სურს რაიმე პრობლემის შექმნა, თუმცა ორი სუბიექტის გაერთიანება „ყველასთვის დიდი წარმატება“ იქნებოდა. როგორც თეთრი სახლის ლიდერმა აღნიშნა, საბოლოოდ, ეს ასე იქნება.

„არ მსურს რაიმე პრობლემა შევქმნა. გეტყვით, ძალიან მინდა, რომ ეს ტერიტორია გაერთიანებული ვნახო. ორივე მხარეს მეგობრები მყავს. იქ შესანიშნავი ხალხია - ირლანდიელები. როგორ შეიძლება, ისინი ცუდი ადამიანები იყვნენ? ძალიან მინდა, რომ გაერთიანებული იყოს. ვფიქრობ, ეს შესანიშნავი რამ იქნებოდა. დიახ, თუ ეს მოხდება, ყველასთვის დიდი წარმატება იქნება. საბოლოოდ, ეს მაინც მოხდება. მოვლენები განვითარდება. ახლა ამაზე ვლაპარაკობთ და აქ თქვენ გყავთ ადამიანი, რომელსაც ამის დაძვრა შეუძლია. მაგრამ, დიახ, ვფიქრობ ეს ფანტასტიკური რამ იქნება. რა თქმა უნდა, გაერთიანებულ სამეფოს ამ საკითხზე სათქმელი ექნება, მაგრამ ვფიქრობ, ეს შესანიშნავი იქნებოდა. ვგულისხმობ, რა შეიძლება იყოს ამაში ცუდი?!“ - განაცხადა ტრამპმა.