ტრამპი: ჩემი გადაწყვეტილების გარეშე, ისრაელი დღეს აღარ იარსებებდა - მე გავაუქმე ბარაკ ჰუსეინ ობამას გარიგება, რომელიც ბირთვული იარაღისკენ მიმავალი გზა იყო

აშშ-ის პრეზიდენტმა, დონალდ ტრამპმა ისრაელის უსაფრთხოებასა და მის მიერ გატარებულ პოლიტიკაზე საუბრისას განაცხადა, რომ ისრაელის არსებობა პირდაპირ კავშირშია მის გადაწყვეტილებებთან.

გამოცემა AXIOS-თან ინტერვიუში ტრამპმა, კერძოდ, ირანის ბირთვული შეთანხმების გაუქმების მნიშვნელობაზე გაამახვილა ყურადღება. მისი თქმით, ბარაკ ობამას ადმინისტრაციის მიერ დადებული გარიგება ირანს ბირთვული იარაღის შექმნის გზას უხსნიდა.

„ჩემი გადაწყვეტილების გარეშე, ისრაელი დღეს აღარ იარსებებდა. მე გავაუქმე ბარაკ ჰუსეინ ობამას გარიგება, რომელიც ბირთვული იარაღისკენ მიმავალი გზა იყო. მათ ის [ბირთვული იარაღი] ხუთი წლის წინ ექნებოდათ და, ჩემი აზრით, პირველივე კვირაში გამოიყენებდნენ“, - განაცხადა პრეზიდენტმა.

ტრამპმა ასევე ისაუბრა სამხედრო ოპერაციებზე და ხაზი გაუსვა B-2 ტიპის ბომბდამშენების გადამწყვეტ როლს ირანის ბირთვული პროგრამის შეფერხებაში. პრეზიდენტის თქმით, ეს ოპერაცია აუცილებელი იყო, რადგან ირანი ბირთვული იარაღის შექმნამდე სულ რაღაც ერთი თვის დაშორებით იმყოფებოდა.

„მათ [ირანს] არ ეგონათ, რომ მე დავბრუნდებოდი. ბევრს არ სჯეროდა ამის, თუმცა მე დავბრუნდი, უკეთესად, ვიდრე მანამდე. B-2 ბომბდამშენებმა და მათმა დიდებულმა პილოტებმა თავიანთი საქმე შეასრულეს. რომ არა ეს დარტყმა, მათ ბირთვული იარაღი ექნებოდათ, რომელსაც ისრაელის წინააღმდეგ გამოიყენებდნენ“, - აღნიშნა ტრამპმა.

პრეზიდენტმა დასძინა, რომ მისი ადმინისტრაციის პოლიტიკამ ისრაელი სრულ განადგურებას გადაარჩინა და დღეს ისრაელის სახელმწიფო უსაფრთხოდ არის სწორედ იმ გადაწყვეტილებების გამო, რომლებიც მან პრეზიდენტობის დროს მიიღო.