ბუაძე: ტრამპ თაუერის პროექტის უკან ოცნების "ბიზნესმენები" დგანან

საბა ბუაძის ინფორმაციით, ამ კვირაში დაგეგმილია ყოფილი იპოდრომის ტერიტორიაზე, ე.წ. ტრამპ თაუერის პროექტის პომპეზური პრეზენტაცია.

ბუაძის თქმით, პროექტის უკან მთლიანად "ქართული ოცნების" დამსახურებული "ბიზნესმენები" დგანან.

"როგორც გავიგე, ამ კვირაში დაგეგმილია ყოფილი იპოდრომის ტერიტორიაზე, ე.წ. ტრამპ ტაუერის პროექტის პომპეზური პრეზენტაცია, სადაც როგორც ამბობენ ტრამპის ოჯახის წარმომადგენელსაც ელოდებიან. ამ პომპეზურმა სახელებმა არ შეგაშინოთ, პროექტის უკან მთლიანად ქართული ოცნების დამსახურებული "ბიზნესმენები" დგანან - ფხაკაძეები, წულაია, კვაჭაძე და ა.შ.

ვისი სახელიც არ უნდა დაარქვან ამ პროექტს, ის არის დანაშაულის ადგილი, რომელიც თბილისელების წინააღმდეგ ქართულმა ოცნებამ ჩაიდინა. შეგახსენებთ, რომ დაგეგმილია 80 ათასი კვადრატლი მეტრის ფართობის ტყის გაჩეხვა და იქ 6 ცათამბჯენის (ყველაზე მაღალი 67 სართული) მშენებლობა", - წერს ბუაძე.

თბილისში, ყოფილი იპოდრომის ტერიტორიაზე, დეველოპერების ჯგუფი "ტრამპ თაუერის" აშენებას აპირებს.

17 აპრილს "ტრამპის ორგანიზაციამ" "ტრამპ თაუერი თბილისის" მშენებლობის შესახებ განცხადება გამოაქვეყნა. განცხადებიდან ვიგებთ, რომ 70-სართულიანი "ტრამპ თაუერი თბილისი" ყველაზე მაღალი შენობა იქნება საქართველოში.