ტრამპი: დიდი ალბათობით მხარს დავუჭერ ნეთანიაჰუს არჩევნებში, თუმცა უნდა ვნახო, ვინ იქნებიან სხვა კანდიდატები

აშშ-ის პრეზიდენტმა, დონალდ ტრამპმა განაცხადა, რომ შემოდგომაზე დაგეგმილ ისრაელის არჩევნებში პრემიერ-მინისტრ ბენიამინ ნეთანიაჰუს დიდი ალბათობით დაუჭერს მხარს, თუმცა მანამდე სურს ნახოს, თუ ვინ იქნებიან ნეთანიაჰუს კონკურენტები.

„უნდა ვნახო, ვინ იყრის კენჭს, მაგრამ ბიბი ძალიან მომწონს. დიდი შანსია, რომ მხარს მას დავუჭერ“, - განუცხადა ტრამპმა ისრაელის საზოგადოებრივ მაუწყებელ Kan-ს სატელეფონო ინტერვიუში.

ამ დროისთვის ნეთანიაჰუს ყველაზე ძლიერ ოპონენტებად ისრაელის თავდაცვის ძალების გენერალური შტაბის ყოფილი უფროსი და პარტია „იაშარის“ ლიდერი გადი ეიზენკოტი და ყოფილი პრემიერ-მინისტრი და პარტია „ერთად“ ლიდერი ნაფტალი ბენეტი მიიჩნევიან.

„ის [ნეთანიაჰუ] ძალიან კარგ საქმეს აკეთებს, თუმცა ცოტა უფრო რაციონალური უნდა იყოს“, - დასძინა ტრამპმა, რაც, სავარაუდოდ, ლიბანში „ჰეზბოლას“ წინააღმდეგ ისრაელის დარტყმებს ეხება, რომლებსაც აშშ განურჩეველად მიიჩნევს.