ტრამპი: Medicaid-ი არასრულწლოვნებისთვის სქესის შეცვლის ოპერაციებსა და ჰორმონოთერაპიას აღარ დააფინანსებს - არ დავაფინანსებთ იმას, რომ ჩვენმა უდანაშაულო ბავშვებმა გაიარონ ეს ბარბაროსული პროცედურები, უბრალოდ წარმოიდგინეთ ყველა ის პატარა, უდანაშაულო და, შესაძლოა, გზააბნეული ბავშვი, რომელიც ამას გადაურჩება

დღეს, ჩემი მითითებით, მეჰმეთ ოზმა გამოაცხადა, რომ სამედიცინო დაზღვევის სახელმწიფო პროგრამა Medicaid-ი არასრულწლოვნებისთვის სქესის შეცვლის ოპერაციებსა და ჰორმონოთერაპიას აღარ დააფინანსებს, - განაცხადა აშშ-ის პრეზიდენტმა, დონალდ ტრამპმა.

„ჩვენ არ დავაფინანსებთ იმას, რომ ჩვენმა უდანაშაულო ბავშვებმა გაიარონ ეს ბარბაროსული ოპერაციები და პროცედურები, რაც მათ ახალგაზრდა ორგანიზმს წარმოუდგენელ და შეუქცევად ზიანს აყენებს. ბოლო წელიწად-ნახევრის განმავლობაში ამ საკითხზე ჩვენი მტკიცე პოზიციისა და ზეწოლის წყალობით, აშშ-ის ათობით საავადმყოფომ უკვე შეწყვიტა სქესის შეცვლის პროცედურები და ველით, რომ მათ კიდევ ბევრი მიჰყვება. უბრალოდ წარმოიდგინეთ ყველა ის პატარა, უდანაშაულო და, შესაძლოა, გზააბნეული ბავშვი, რომელიც ამას გადაურჩება!“ - აღნიშნა აშშ-ის პრეზიდენტმა.

„მაშინ, როცა დემოკრატიულ პარტიას სურს, თქვენს შვილებს ხმის მიცემის ასაკამდეც კი შეეძლოთ სასქესო ორგანოების დასახიჩრება, პრეზიდენტი დონალდ ტრამპი (მე!) და რესპუბლიკური პარტია ვამბობთ, რომ ეს სრული აბსურდია - ჩვენ დავიცავთ ამერიკელ ბავშვებს! გთხოვთ, ეს გახსოვდეთ, როდესაც ნოემბრის შუალედურ არჩევნებში ხმას მისცემთ“, - დასძინა მან.