ტრამპი: მელონი მეხვეწებოდა, სურათი გადამეღო მასთან, შემეცოდა

აშშ-ის პრეზიდენტმა დონალდ ტრამპმა იტალიურ მედიასთან ინტერვიუში განაცხადა, რომ იტალიის პრემიერ-მინისტრი ჯორჯია მელონი მას „დიდი შვიდეულის“ სამიტზე სურათის გადაღებას სთხოვდა.

როგორც მედია იუწყება, ინტერვიუს დასაწყისში ტრამპი მელონით დაინტერესდა.

„როგორ არის თქვენი პრემიერ-მინისტრი? რა თქვა, როცა შემხვდა? ალბათ, ის მოხარულია, რომ მას გავესაუბრე“, - განაცხადა ტრამპმა.

თეთრი სახლის ლიდერმა იტალიელ ჟურნალისტებს აგრეთვე განუცხადა, რომ მას არ უნდა ესაუბრა მელონისთან.

„არ უნდა მესაუბრა მასთან. არ ვიცი, რა ვთქვა. მეხვეწებოდა, სურათი გადამეღო. მას ძალიან უნდოდა, რომ სურათი გადამეღო. არ დავთანხმდებოდი, მაგრამ შემეცოდა“, - თქვა ტრამპმა.

როგორც იტალიური მედია აღნიშნავს, მელონი ერთ დროს ტრამპის უახლოესი მეგობარი იყო. ის იყო ერთადერთი ევროპელი ლიდერი, რომელიც გასულ წელს აშშ-ის პრეზიდენტის ინაუგურაციას დაესწრო.

თუმცა, ტრამპსა და მელონის შორის ურთიერთობა ირანში ომის დაწყების შემდეგ გაფუჭდა. იტალიამ სიცილიაზე არსებული ავიაბაზით სარგებლობის უფლება აშშ-ს არ მისცა. ამის გამო ტრამპმა მელონი უმოქმედობაში დაადანაშაულა და აღნიშნა, რომ ის შეიცვალა. ტრამპის განრისხება გამოიწვია იმ ფაქტმაც, რომ მელონი რომის პაპი ლეო მე-XIV თეთრი სახლის კრიტიკისგან დაიცვა.

მედიის ცნობით, „დიდი შვიდეულის“ სამიტის შემდეგ მელონიმ განაცხადა, რომ ტრამპთან ურთიერთობები არ შეცვლილა, არავითარი „ურთიერთბრალდება“ არ გაჟღერებულა და ორ ლიდერს ერთმანეთის ესმის.