ტრამპის განცხადებით, ირანთან მოლაპარაკებები ფინალურ ეტაპზეა - შეთანხმების ჩაშლის შემთხვევაში ის თავდასხმებით იმუქრება

აშშ-ის პრეზიდენტმა, დონალდ ტრამპმა ოთხშაბათს განაცხადა, რომ ირანთან მოლაპარაკებები დასკვნით ეტაპზეა, თუმცა ქვეყანა შემდგომი თავდასხმების შესახებ გააფრთხილა, თუკი თეირანი შეთანხმებას არ დათანხმდება.

„ირანთან მიმართებით დასკვნით ეტაპზე ვართ. ვნახოთ, რა მოხდება. ან შეთანხმებას მივაღწევთ, ან მოგვიწევს ისეთი რაღაცების გაკეთება, რაც ცოტა არ იყოს, უსიამოვნო იქნება, თუმცა, იმედია, ეს არ დასჭირდებათ“, - განუცხადა მან ჟურნალისტებს ოთხშაბათს.

„ჩვენ ამას ერთ შანსს მივცემთ. არსად მეჩქარება“, - თქვა ტრამპმა. „იდეალურ შემთხვევაში, მირჩევნია ცოტა ადამიანი დაიღუპოს, ვიდრე ბევრი. ჩვენ ორივე გზით შეგვიძლია მოქმედება“.

თეირანმა, თავის მხრივ, ტრამპი ომის განახლების მცდელობაში დაადანაშაულა და დაიმუქრა, რომ ნებისმიერ დარტყმას ახლო აღმოსავლეთის ფარგლებს გარეთ განხორციელებული თავდასხმებით უპასუხებს.

„თუ ირანის წინააღმდეგ აგრესია განმეორდება, დაპირებული რეგიონული ომი ამჯერად რეგიონის საზღვრებს გასცდება“, - ნათქვამია „ისლამური რევოლუციის გუშაგთა კორპუსის“ განცხადებაში.